Վրաստանում կապիկի ծաղիկի առաջին դեպքի գրանցման պատճառով Հայաստան-Վրաստան սահմանի փակման հարց չի քննարկվում այս պահին։ Այս մասին Sputnik Արմենիայի եթերում հայտնեց ԱՆ Հիվանդությունների վերահսկման և կանխարգելման ազգային կենտրոնի համաճարակաբանության բաժնի պետ Լուսինե Պարոնյանը։
«Վրաստանի հետ մուտքի փակման հարցը դեռ չի քննարկվում։ Եվրոպական մի շարք այլ երկրներ էլ կան, որտեղ դեպքեր հայտնաբերվել են, ոչ մեկի հետ սահմանափակում չի մտցվել»,- ասաց Պարոնյանը։
Ընդհանրապես, ԱՀԿ-ն այս պահին ճանապարհորդությունների սահմանափակման որևէ առաջարկ դեռևս չի արել։ Իսկ Հայաստանում կանխարգելիչ միջոցառումներ են արվում` համապատասխան գրություններ են ուղարկվել առողջապահության աշխատանքի տեսչական մարմին, որպեսզի սահմանի անցման կետերում հսկողությունն ուժեղացնեն, եթե կասկածելի հիվանդ լինի՝ վաղ հայտնաբերվի։
Պարոնյանը նշեց, որ այս կապակցությամբ ստեղծվել է աշխատանքային խումբ, որը աշխատում է և՛ մեթոդական փաստաթղթերի, և՛ կանխարգելման փուլի միջոցառումների պլանի վրա։ Քննարկում են տարբեր հարցեր, այդ թվում՝ զանգվածային հավաքների հարցը։
«Ճշտում ենք, թե որտեղ են նախատեսվում այդպիսի զանգվածային հավաքներ, որ համապատասխան միջոցառումներ իրականացնենք։ Զանգվածային հավաքներն արգելելու մասին որևէ առաջարկություն դեռ չկա, ամեն դեպքում ուզում ենք պատրաստ լինել»,- նշեց նա։
Պարոնյանն ասաց, որ այս պահի դրությամբ Հայաստանում կապիկի ծաղիկի կասկածելի դեպքեր չեն եղել։ Այնուամենայնիվ, բուժաշխատողների շրջանում բարձրացվել է իրազեկվածությունը, համապատասխան գրություններ են ուղարկվել, որ բոլորն ուշադիր լինեն, զգույշ լինեն։ Նաև մաշկաբանների ու վարակաբանների համար ուսումնական դասընթացներ են անցկացվել, որոնք շարունակական են լինելու։
Վրաստանում արձանագրված դեպքից հետո ևս մեկ անգամ տեսչական մարմնին կահազանգեն, որ հատկապես Վրաստանի սահմանին նախազգուշական միջոցառումներն ուժեղացվեն։
Պարոնյանը նաև տվյալներ հայտնեց աշխարհում հիվանդության արձանագրված դեպքերի թիրախային խմբերի վիճակագրությունից։ Ըստ նրա՝ այս պահին ավելի շատ դեպքեր հայտնաբերվում են համասեռամոլների ու նրանց ընտանիքի անդամների շրջանում։
«Հիվանդների մեծ մասը երիտասարդ տղամարդիկ են։ Ամբողջ աշխարհում համասեռամոլների շրջանում է նպատակային աշխատանք իրականացվում»,- ասաց նա։
Հիշեցնենք, որ այսօր Վրաստանում հետազոտությունից հետո հաստատվել է կապիկի ծաղիկով հիվանդանալու առաջին դեպքը։ Հիվանդությունը թեթև ընթացք է ունեցել, և համապատասխան բուժումից հետո բուժառուն դուրս է գրվել բուժհաստատությունից։ Վարակը հայտնաբերվել է, երբ այդ անձը վերադարձել է Եվրոպայից։