ԵՐԵՎԱՆ, 15 հունիսի – Sputnik. Հայաստանի խորհրդարանը վավերացրեց ԱՊՀ «Ռազմական նշանակության արբանյակային կապի համակարգերի օգտագործման և դրանց հետագա կատարելագործման մասին» համաձայնագիրը։
Դրա շնորհիվ մեր երկիրը կարող է օգտվել ՌԴ ռազմական նշանակության տիեզերական սարքերի ռեսուրսից, եթե համաձայնագրին միացած ԱՊՀ անդամ մյուս երկրները դեմ չլինեն։
Պաշտպանության փոխնախարար Արման Սարգսյանը երեկ` հունիսի 14-ին, ԱԺ–ում համաձայնագրի ներկայացման ժամանակ ասել էր, որ ռազմատեխնիկական աջակցության անհատույց տրամադրման հնարավորությունը սահմանվում է Ռուսաստանի ու Հայաստանի պաշտպանության նախարարությունների և համաձայնագրի մասնակից այլ պետությունների պաշտպանական գերատեսչությունների միջև կնքվող երկկողմ պայմանագրերի միջոցով։
Պաշտպանության փոխնախարարը նաև հայտնել էր, որ Հայաստանը համաձայնագիրը վավերացնում է մեկ վերապահումով, որ հետագայում առանձին որոշումներ կկայացնի համաձայնագրին միացող երկրների վրա համաձայնագրի դրույթների տարածման վերաբերյալ։
«Ռազմական նշանակության արբանյակային կապի համակարգերի օգտագործման և դրանց հետագա կատարելագործման մասին» համաձայնագիրը ստորագրվել էր 2018 թվականի հունիսի 6-ին Ռուսաստանի Դաշնության Կզըլ քաղաքում կայացած ԱՊՀ պաշտպանության նախարարների խորհրդի հերթական նիստում։
ՀՀ այդ ժամանակվա պաշտպանության նախկին նախարար Դավիթ Տոնոյանը համաձայնագիրը չէր ստորագրել, ըստ ոչ պաշտոնական վարկածի, Ադրբեջանի հետ նույն համակարգից օգտվելու մտահոգության պատճառով։
Համաձայնագիրն ուժի մեջ է մտել 2020թ. հունվարի 1-ին: Փաստաթուղթը ստորագրել են ՌԴ–ն, Բելառուսը, Ղազախստանը, Ղրղզստանը, չեն ստորագրել Ադրբեջանը, Ուկրաինան, Ուզբեկստանը, Թուրքմենստանը, Մոլդովան։
Հայաստանի կառավարությունը համաձայնագիրը հաստատել է այս տարվա փետրվարի 23-ի նիստում, որից հետո ներկայացվել է խորհրդարանի վավերացմանը։