ԵՐԵՎԱՆ, 14 հունիսի –Sputnik. Կիևը դիմել է Սևերոդոնեցկի «Ազոտ» կոմբինատից քաղաքացիական անձանց դուրս գալու համար հումանիտար միջանցք բացելու խնդրանքով: Տեղեկությունը հայտնել է Ռուսաստանի Դաշնության հումանիտար արձագանքման միջգերատեսչական համակարգող շտաբի ղեկավար, Ռուսաստանի Դաշնության պաշտպանության կառավարման ազգային կենտրոնի պետ, գեներալ-գնդապետ Միխայիլ Միզինցևը:
«Ուկրաինական կողմը դիմել է հումանիտար միջանցք կազմակերպելու խնդրանքով Սևերոդոնեցկի «Ազոտ» քիմիական կոմբինատում գտնվող քաղաքացիական անձանց (կանանց, երեխաների ու տարեց մարդկանց) Կիևի վերահսկողության տակ գտնվող Լիսիչանսկ քաղաք տարհանման համար»,- հայտնել է նա:
Միզինցևն ասել է, որ Ռուսաստանի ու ԼԺՀ-ի զինծառայողները պատրաստ են չորեքշաբթի օրը «Ազոտ» գործարանում պահվող խաղաղ բնակիչների տարհանման գործողություն իրականացնել։
«Ղեկավարվելով մարդասիրական սկզբունքներով՝ Ռուսաստանի Զինված ուժերը և Լուգանսկի Ժողովրդական Հանրապետության կազմավորումները պատրաստ են խաղաղ քաղաքացիների տարհանման մարդասիրական գործողություն իրականացնել։ Դրա համար 2022 թվականի հունիսի 15-ին, ժամը 08:00-ից մինչև 20:00-ն հումանիտար միջանցք է բացվում հյուսիսային ուղղությամբ (Լուգանսկի Ժողովրդական Հանրապետության Սվատովո քաղաք)»,- ասել է նա։
Գեներալն առաջարկել է ազգային գումարտակների գրոհայիններին և «Ազոտ» կոմբինատում գտնվող օտարերկրյա վարձկաններին հունիսի 15-ի ժամը 08:00-ից դադարեցնել ցանկացած մարտական գործողություն և ազատ արձակել իրենց կողմից պահվող խաղաղ քաղաքացիներին մարդասիրական միջանցքով, ինչպես նաև դադարեցնել անիմաստ դիմադրությունն ու վայր դնել զենքը։
«Ռուսաստանի Դաշնությունը երաշխավորում է կյանքի ու ռազմագերիների հետ վարվելու վերաբերյալ Ժնևյան կոնվենցիայի բոլոր նորմերի պահպանումը, ինչպես դա տեղի է ունեցել նախկինում Մարիուպոլում գերեվարված անձանց հետ։ Ուկրաինական կողմի փաստացի պատրաստակամությունը հումանիտար գործողություն սկսելու վերաբերյալ ազդարարվում է սպիտակ դրոշների բարձրացմամբ»,- ասել է նա։
Ընդ որում, նրա խոսքով, անհրաժեշտ է հաշվի առնել, որ ազգայնականները Սևերոդոնեցկից նահանջելիս դիտավորյալ քաղաքի բնակիչներին տարել են «Ազոտ» կոմբինատ` նրանց որպես «բնական վահան» օգտագործելու համար:
Միզինցևն ասել է, որ Ռուսաստանի պաշտպանության նախարարությունը Կիևի խնդրանքը գնահատում է որպես «Մարիուպոլի սցենարով» հումանիտար ակցիայի քողի տակ «Ազոտ» կոմբինատից փրկված մարտական ստորաբաժանումները Լիսիչանսկ դուրս բերելու փորձ։
Նա նշել է, որ հումանիտար միջանցքը դեպի Սվատովո է (հյուսիսային ուղղությամբ), քանի որ հունիսի 13-ին ուկրաինացի զինծառայողները պայթեցրել են Հյուսիսային Դոնեցով անցնող միակ կամուրջը Լիսիչանսկի ուղղությամբ:
«Տարածքային պաշտպանության ստորաբաժանումների նահանջը թույլ չտալու նպատակով Ուկրաինայի ԶՈւ զինծառայողները պայթեցրել են վերջին կամուրջը Հյուսիսային Դոնեց գետի վրայով դեպի Լիսիչանսկ, տվյալ ուղղությամբ անվտանգ տարհանում իրականացնելն անհնար է»,- հայտնել է նա։
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։
Ուկրաինայում մարտական գործողությունները շարունակվում են արդեն 111-րդ օրը։