ԵՐԵՎԱՆ, 14 հունիսի – Sputnik. Ռուսաստանը և հատկապես Մոսկվան մեծ շուկա է հայկական սառեցված պատրաստի ուտեստների համար։ Sputnik Արմենիայի հետ զրույցում այս մասին ասաց Sunland հայկական ընկերության տնօրեն Արտյոմ Թադևոսյանը՝ Summit Armenia բիզնես ֆորումի շրջանակներում, որը կազմակերպվել է Երևանում «Клуб первых» («Առաջինների Ակումբ», Մոսկվա) գործարար համայնքի կողմից:
Նրա խոսքով` ավելի ու ավելի պահանջված են դառնում ոչ թե պահածոյացման տարրաներով, այլ թարմ սառեցված պատրաստի ուտելիքները։ Թադևոսյանի ընկերությունը խորոված սմբուկ է առաքում Մոսկվա։ Պատրաստումից անմիջապես հետո սմբուկը շոկային սառեցման է ենթարկվում, այնուհետև սառեցվող կոնտեյներներով տեղափոխվում է Մոսկվա։
«Այդ պայմաններում մթերքը երկար կարելի է պահել, ուստի պատվիրատուներին (դրանք հիմնականում Մոսկվայի հյուրանոցներն ու ռեստորաններն են) կարելի է խորոված սմբուկ ու պղպեղ մատակարարել ամբողջ տարին (ոչ միայն սեզոնին), կայուն գներով, ինչը խիստ ձեռնտու է ցանկացած բիզնեսի համար»,- ավելացրեց Թադևոսյանը։
Մոսկվայում աճում է պատրաստի սննդի առաքման պահանջարկը (այդ թվում՝ առօրյա գործածության), և Մոսկվայի շուկան այս ոլորտում ամենամեծերից մեկն է աշխարհում: Ուստի, գործարարը կարծում է, որ հիմա շատ հարմար ժամանակ է այլ թարմ սառեցված ուտեստներ փորձարկելու համար։
«Նույնկերպ մենք հիմա սկսել ենք տոլմա արտադրել, նաև այլ կերակրատեսակներ։ Ինչ-որ բան կարող է հաջող ստացվել, ինչ-որ բան՝ ոչ այնքան, բայց պետք է մշտապես փորձել, հնարավորությունների պատուհանը շատ լայն է»,-նկատեց նա։
Ակնհայտ է, որ Ռուսաստանում գնողունակության նվազման ռիսկեր կան, բայց մյուս կողմից կրճատվում է նաև ներմուծումը, ինչը տեղ է բացում նաև հայկական ապրանքների համար, այդ թվում՝ աճող սեգմենտում։
Մոսկվայում բացված իր ևս մեկ արտադրության միջոցով գործարարն արդեն սկսել է համագործակցել «Яндекс еда» առաքման ծառայության հետ։