Արցախի Հանրապետության ազգային անվտանգության ծառայությունը բացահայտել է պետական դավաճանության ևս մեկ դեպք։ Տեղեկությունը հայտնում է Արցախի ԱԱԾ մամուլի ծառայությունը։
Նշվում է, որ Արցախի Հանրապետության քաղաքացի Լ. Գ.–ն, որը նաև զինծառայող է, 2021 թվականի հունվար–փետրվար ամիսներին «Ֆեյսբուքի» միջոցով կապ է հաստատել օտարերկրյա աշխատակցի կողմից օգտագործվող հայ աղջկա տվյալներով գրանցված օգտահաշվի հետ։
«Որոշ ժամանակ նրա հետ շփվելուց հետո, վերջինս բանկային փոխանցման միջոցով ստացել է 150 ԱՄՆ դոլար գումար։ Փողի դիմաց նրան է հայտնել ռազմական բնույթի որոշակի տեղեկություններ»,– ասված է հաղորդագրությունում։
Հայ աղջկա օգտահաշիվ կիրառողի միջնորդությամբ, 2021 թվականի փետրվար ամսից բջջային հեռախոսի հավելվածով շարունակել է շփումը օտարերկրյա հատուկ ծառայության մեկ այլ ներկայացուցչի հետ։ Ծառայության բերումով, տիրապետելով ՊԲ N զորամասի պահպանության ներքո գտնվող սահմանագծի երկայնքով տեղակայված մարտական դիրքերի կոորդինատորների, կահավորվածության, սպառազինության, հերթափոխում ընդգրկված զինծառայողների քանակի և մարտական հերթապահության հետ կապված այլ տեղեկությունների, 2021 թ. մարտ ամսից մինչև 2022 թվականի մայիսն ընկած ժամանակահատվածը, հավաքվել և բջջային հեռախոսի հավելվածով նրան է փոխանցել պետական և ռազմական գաղտնիք կազմող տեղեկություններ։
«Ինֆորմացիան եղել է զորակոչի, զորամասի զրահատեխնիկայի, տրասնպորտային միջոցների, զորամասի պահպանության տակ գտնվող մարտական դիրքերի, զորամասի տեղակայման և շենքերի դասավորվածության, զորամասի կարգացուցակների վերաբերյալ։ Նա նաև տեղեկություն է տրամադրել Արցախի շրջաններում այլ զորամասերի, ինչպես նաև հանրապետությունում տեղակայված ՌԴ խաղաղապահ ուժերի մասին։ Այս ամենի դիմաց բանկային փոխանցման միջոցով օտարերկրյա պետության հատուկ ծառայության աշխատակցից ստացել է 1400 ԱՄՆ դոլար վարձատրություն»,– նշված է ԱԱԾ հաղորդագրությունում։
Վնաս է պատճառվել Արցախի Հանրապետության տարածքային անձեռնմխելիությանը և արտաքին անվտանգությանը։ Լ.Գ.–ն օտարերկրյա հատուկ ծառայության ներկայացուցիչներից ընդհանուր առմամբ վարձատրվել է 1550 ԱՄՆ դոլարով։
Փաստի առթիվ Արցախի ԱԱԾ–ում հարուցվել է քրեական գործ` քրեական օրենսգրքի 310-րդ հոդվածի 1-ին մասով նախատեսված հանցագործության հատկանիշներով։ Լ.Գ.–ն ձերբակալվել է ու տվել խոստովականան ցուցմունք։ Քննությունը շարունակվում է։