ԵՐԵՎԱՆ, 9 հունիսի – Sputnik. Ռուսական կողմը աշխատանքներ է տանում Հայաստանում ռուսական դպրոցների թիվն ավելացնելու ուղղությամբ։ Ռուսաստանի արտգործնախարար Սերգեյ Լավրովն այս հայտարարությունն արեց հայ գործընկերոջ` Արարատ Միրզոյանի հետ համատեղ ասուլիսում։
«Մենք պահպանում և ամրապնդում ենք հանրակրթական, գիտական և լեզվական միջավայրը։ Հաշվի առնելով մեր հայ ընկերների ցանկությունները՝ աշխատում ենք հանրապետությունում ռուսական դպրոցների քանակի ավելացման ուղղությամբ, օգնում ենք ռուսաց լեզվի հայազգի ուսուցիչների որակավորման բարձրացմանը, ինչպես նաև ռուսական բուհերում ուսանելու ցանկություն ունեցողների համար չափաքանակների ավելացման հարցում»,- ասաց Լավրովը։
Նրա խոսքով՝ 2022-ին նախատեսվում է տնտեսական համագործակցության հերթական նստաշրջանն անցկացնել փոխվարչապետ Ալեքսեյ Օվերչուկի և Մհեր Գրիգորյանի նախագահությամբ: Նաև միջտարածաշրջանային, երիտասարդական համաժողովներ են նախատեսված, Երևանի կենտրոնում տեղադրվելու է «Ռուս-հայկական բարեկամություն. դարավոր միասնություն» հուշարձանը:
Ռուսաստանում հունիսի 10-ից մեկնարկելու են ՀՀ մշակույթի օրերը, իսկ երկրորդ կիսամյակում Ռուսաստանի հոգևոր մշակույթի օրեր կանցկացվեն ՀՀ–ում ։
«Այս ճանաչողական ակցիաները մեր հնագույն մշակույթների հետագա հարստացման հնարավորություն են ստեղծում»,– ասաց Լավրովը։
Նրա խոսքով` Ռուսաստանը շարունակում է մնալ Հայաստանի առաջատար առևտրային գործընկերը, ինչպես նաև տնտեսության մեջ ներդրողը: Երևանն ու Մոսկվան ընդլայնում են համագործակցությունն այնպիսի ոլորտներում, ինչպիսիք են էներգետիկան, հանքարդյունաբերությունը, տրանսպորտը, լոգիստիկան, բարձր տեխնոլոգիաները։ Կողմերը մտադիր են խրախուսել գործարար առաքելությունների ու գործարար համաժողովների անցկացման պրակտիկան: