ԵՐԵՎԱՆ, 8 հունիսի – Sputnik. ՀՀ վարչապետ Նիկոլ Փաշինյանի որոշմամբ` պետական եկամուտների կոմիտեի նախագահի տեղակալն ազատվել է պաշտոնից, տեղեկանում ենք ՀՀ էլեկտրոնային կառավարման հարթակից։
«Ղեկավարվելով «Հանրային ծառայության մասին» օրենքի 9-րդ հոդվածի 4-րդ մասով՝ Շուշանիկ Ներսիսյանին ազատել պետական եկամուտների կոմիտեի նախագահի տեղակալի պաշտոնից»,- գրված է Փաշինյանի որոշման մեջ։
Ներսիսյանն այդ պաշտոնին էր նշանակվել 2018-ի օգոստոսին։
Ավելի վաղ ԼՂՀ արտակարգ իրավիճակների պետական ծառայության պետի նախկին տեղակալ Բորիս Ավագյանը հայտարարել էր, որ ինքն աջակցել է մի խումբ անձանց, որպեսզի նրանք խուսափեն մաքսատուրք վճարելուց: Եվ այդ խումբը, ըստ Ավագյանի, կազմված էր Հայաստանի մաքսային ծառայության պետ Շուշանիկ Ներսիսյանից, ֆինանսների նախկին նախարար Դավիթ Անանյանից։ Եվ այս ամենն իրականացվում էր ՀՀ վարչապետ Նիկոլ Փաշինյանի գիտությամբ։
Ներսիսյանի անունը շրջանառվում էր նաև 2020 թվականի ապրիլին տեղի ունեցած ծխախոտային սկանդալի մեջ։ ՌԴ ԱԴԾ և մաքսային ծառայության աշխատակիցները Կրասնոդարի օդանավակայանում առգրավել էին մաքսանենգ ծխախոտի 2700 տուփ, և տարբեր ապրանքանիշների տուփերի վրա հայկական ակցիզ էր եղել:
Ըստ հաղորդագրությունների` ապրանքը Կրասնոդարի և Դուշանբեի կանգառներով Հայաստանից Աֆղանստան էր տարվում։ Ընդ որում` նշվում էր, որ տրանզիտային օդանավը պատկանում է ՀՀ ԱԻ նախարարությանը։ Այս թեմային քանիցս անդրադարձել է նաև ՀՀ երրորդ նախագահի փեսա Միքայել Մինասյանը, որը տեսանյութերից մեկում հայտարարել էր` պատմությանը մասնակից է նաև Շուշանիկ Ներսիսյանը։