ԵՐԵՎԱՆ, 7 հունիսի – Sputnik. Տեղահանված արցախցի ընտանիքներին բնակարանի ձեռքբերման պետական աջակցության ծրագիրը տեղափոխվում է առարկայական փուլ։ Տեղահանված և զոհված կամ անհետ կորած որդի ունեցող ծնողների հետ հանդիպման ժամանակ վստահեցրել է Արցախի բնակարանային հարցերի կոմիտեի նախագահ Արմեն Մանգասարյանը, հայտնում է Արցախի օպերատիվ շտաբը։
Նշենք, որ ՀՀ–ում Արցախի կառավարության օպերատիվ շտաբի պետ Միքայել Վիրաբյանը հանդիպել է Հայաստանում Արցախի մշտական ներկայացուցիչ Սերգեյ Ղազարյանի և Մանգասարյանի հետ։
«Շահառու ընտանիքներին, բացի ՀՀ–ում բնակարանային մատչելիության ապահովման պետական աջակցության ծրագրի համար սերտիֆիկատներ տրամադրելուց, ըստ հաջորդականության (բնակարանը ձեռք բերելուց հետո), կտրամադրվեն նաև բնակտարածքի կահավորման սերտիֆիկատներ»,–ասել է Մանգասարյանը։
Նշենք, որ բնակտարածքի ձեռքբերման արժեքի պետական աջակցության առավելագույն չափը մեկ կամ երկու անձի դեպքում կազմում է 20 մլն դրամ, երեք անձի դեպքում՝ 21 մլն դրամ, իսկ չորս և ավելի անձանց դեպքում՝ 22 մլն դրամ: Իսկ կահավորման համար պետաջակցության առավելագույն չափը մեկ կամ երկու անձի դեպքում կկազմի 1 300 000 դրամ, երեք կամ չորս անձի դեպքում՝ 1 600 000 դրամ, հինգ և ավելի անձանց դեպքում՝ մինչև 2 000 000 դրամ։
Նշվում է, որ փաստաթղթերի ընդունման մեկնարկը տրված չէ, քննարկումներն ավարտելուց հետո գերատեսչությունները կտարածեն հայտերի ընդունման մասին հաղորդագրություն։
Հիշեցնենք, որ ծրագրի շրջանակում 2020 թ․ պատերազմի հետևանքով տեղահանված շուրջ 3000 արցախցի ընտանիք հնարավորություն ունեն ձեռք բերել կամ կառուցել իրենց սեփական բնակելի տներն ու բնակարանները։ Իսկ շահառուներն են Արցախում 2020 թվականի սեպտեմբերի 27-ի դրությամբ բնակված կամ Արցախում հաշվառված, առնվազն վերջին երեք ամիսներին փաստացի բնակված կամ վերջին երեք տարում փաստացի բնակված և պատերազմի հետևանքով տեղահանված ընտանիքները։ Ծրագրի ընթացակարգը հաստատվել էր այս տարվա ապրիլին։