ԵՐԵՎԱՆ, 3 հունիսի – Sputnik. «Դիմադրություն» շարժման մասնակիցների ու ոստիկանության միջև ծեծկռտուք սկսվեց այն բանից հետո, երբ շարժման անդամ, ԱԺ փոխնախագահ Իշխան Սաղաթելյանը հայտարարեց, որ Պռոշյան փողոցից` կառավարական առանձնատան հարակից հատվածից, երթով գնում են Ազգային ժողով։
Ոստիկանությունը կենդանի պատ էր կազմել ու փակել Պռոշյանից Դեմիրճյան փողոց տանող ճանապարհահատվածը։ Ցուցարարները փորձեցին ճեղքել ոստիկանների դիմադրությունը, ինչից հետո հրմշտոց ու ծեծկռտուք սկսվեց կողմերի միջև։
Ինչպես իրադարձության վայրից հայտնում է Sputnik Արմենիայի թղթակիցը, տարածքում ոստիկանությունը նաև լուսաձայնային նռնակներ է կիրառել։ Ի դեպ, մեկ ամսից ավելի տևող ակցիաների ընթացքում այսօր առաջին անգամ կիրառվեցին լուսաձայնային նռնակներ` մասնակիցներին ցրելու համար։ Ոչ պաշտոնական տվյալներով` կան տուժածներ ու բերման ենթարկվածներ։
Նշենք, որ ժամը 20։00-ին լրացել է ԱԺ արտահերթ նիստին գրանցվելու համար սահմանված առավելագույն 4 ժամը։ ԱԺ նախագահ Ալեն Սիմոնյանը ժամը 20։00-ին դատարկ դահլիճում հայտարարեց, որ ընդդիմության նախաձեռնած արտահերթ նիստը չկայացավ։