ԵՐԵՎԱՆ, 2 հունիսի – Sputnik. Հունիսի 3-ին ընդդիմությունը գնալու է խորհրդարան` արտահերթ նիստին մասնակցելու։ Այս մասին իր ֆեյսբուքյան էջում գրել է «Դիմադրություն» շարժման անդամ, ԱԺ փոխնախագահ, Հայաստան» խմբակցության պատգամավոր Իշխան Սաղաթելյանը։
«Վաղը՝ ժամը 16։00-ին, խորհրդարանում նշանակված է արտահերթ նիստ, մենք գնալու ենք խորհրդարան։ Մինչև այդ ժամը բոլորի համար կա հնարավորություն` արտահայտելու իրենց դիրքորոշումը»,- գրել է Սաղաթելյանը։
Նա քաղաքացիներին կոչ է արել հունիսի 3-ին, ժամը 16։00-ին հավաքվել Ֆրանսիայի հրապարակում` աջակցել ընդդիմադիր խմբակցությունների պատգամավորներին և, կախված խորհրդարանում տեղի ունեցող գործընթացներից, որոշել հետագա անելիքները։
«Վաղը մենք բոլորս ունենալու ենք Արցախի և հայ-թուրքական հարաբերությունների հարցում սեփական ընտրությունը կատարած բոլոր գործիչների անուն-ազգանունները»,- նշում է Սաղաթելյանը։
Մայիսի 25-ին հայտնի դարձավ, որ խորհրդարանական երկու ընդդիմադիր խմբակցությունները ՝ «Պատիվ ունեմ»-ը և «Հայաստանը», հանդես են եկել արտահերթ նիստ հրավիրելու նախաձեռնությամբ։ Նրանք առաջարկում են, որ ԱԺ-ն հայտարարությամբ հանդես գա, որում ի թիվս այլ դրույթների նշվի, որ Արցախը երբեք չի եղել ու չի լինելու Ադրբեջանի կազմում։
Այդ հարցով ԱԺ-ում հրավիրվեց արտահերթ նիստ, բայց իշխող «Քաղաքացիական պայմանագիրը» հայտարարեց, որ նիստին չի մասնակցելու։