ԵՐԵՎԱՆ, 1 հունիսի – Sputnik. Այս տարվա օգոստոսի 1-ից Հայաստանում կսկսեն գործել ավտոմեքենաներում տեղադրված գազաբալոնների ստուգման կայանները։
Այս մասին այսօր ԱԺ–ում 2021թ–ի բյուջեի կատարողականի հաշվետվության նախնական քննարկման ժամանակ հայտնեց ՀՀ տարածքային կառավարման ու ենթակառուցվածքների նախարար Գնել Սանոսյանը։
«Սա շատ կարևոր է անվտանգության տեանկյունից, և տեխզննման կայաններին զուգահեռ մեր երկրում հիմա գազաբալոնների ստուգման կայաններ են բացվում, որտեղ երկու տարին մեկ անգամ գազաբալոնները պետք է պարտադիր ստուգման ենթարկեն»,– ասաց Սանոսյանը։
ՀՀ կառավարության ապրիլի 28-ի նիստում վարչապետ Նիկոլ Փաշինյանը հայտարարեց, որ Հայաստանում ներդրվում է գազաբալոնների անվտանգ շահագործման համակարգ, որի դեպքում էլեկտրոնային շտեմարանները թույլ կտան ճանապարհային ոստիկաններին առանց մեքենան կանգնեցնելու ստուգել համապատասխան լիցենզիայի առկայությունը։ Ավտոմատ համակարգը չի թույլատրի մեքենան լիցքավորել, եթե գազաբալոնի շահագործման վկայական չկա։