ԵՐԵՎԱՆ, 30 մայիսի – Sputnik. Երևանում ընթացող Եվրոպայի առաջնության կիսաեզրափակիչում հայ բռնցքամարտիկները ռինգում են մնացել մինչև գիշերվա ժամը 4-ը` բողոքելով մրցավարների որոշման դեմ։
Մարզիկների հետ Կարեն Դեմիրճյանի անվան մարզահամերգային համալիրում են մնացել նաև Հայաստանի բռնցքամարտի ֆեդերացիայի անդամներն ու մրցաշարի կազմակերպիչները։
Միաժամանակ, մրցավարների որոշումներից իրենց դժգոհությունն են հայտնել նաև Ուկրաինայի պատվիրակության անդամները։
Բոյկոտի արդյունքում մրցավարները ստիպված են եղել կրկին դիտել թե՛ հայ, և թե՛ ուկրաինացի բռնցքամարտիկների մենամարտերի տեսանյութերը։
Նշենք, որ մայիսի 29-ին կիսաեզրափակիչում հայ բռնցքամարտիկ Նարեկ Մանասյանը մենամարտել է իսպանացի Էմանուել Ռեյեսի հետ, որին մրցավարները հաղթանակ են շնորհել։ Առաջին ռաունդից հետո մրցավարները նախապատվությունը տվել էին հայ բռնցքամարտիկին, երկրորդ և երրորդ ռաունդներում` իսպանացուն (1:4, 0:5):
Մանասյանն ու Հայաստանի հավաքականը, դժգոհ լինելով մրցավարների որոշումից, հրաժարվել էին լքել ռինգը՝ սպառնալով բոյկոտել առաջնության վերջին օրը։
Ռինգ էր մտել նաև ուկրաինական պատվիրակությունը՝ դժգոհ ուկրաինացի բռնցքամարտիկ Յուրի Զախարաևի և բրիտանացի Մոհամեդ Հարիս Աքբարի մենամարտի վերաբերյալ մրցավարների որոշումներից։
Ֆեդերացիայի աղբյուրները Sputnik Արմենիային հայտնել են, որ բողոքարկված մենամարտերի վերաբերյալ վերջնական որոշում դեռ չի ընդունվել։
Այսօր ժամը 17:00-ին պետք է սկսվեն եզրափակիչ մենամարտերը, իսկ մինչ այդ, մրցավարները ստիպված կլինեն որոշել եզրափակիչի մասնակիցներին։