ԵՐԵՎԱՆ, 26 մայիսի – Sputnik. ՀՀ կառավարության որոշմամբ, 2022 թվականի կառավարության պահուստային ֆոնդից Հայաստանի մարզական ֆեդերացիաներին կտրամադրվի լրացուցիչ 200 մլն դրամ։
Կառավարության նիստում ընդունված որոշումը ներկայացրեց ՀՀ կրթության, գիտության, մշակույթի և սպորտի նախարարի տեղակալ Արա Խզմալյանը` նշելով, որ այն բխում է 2022 թվականի Եվրոպայի և աշխարհի առաջնություններին պատշաճ և մարզիկների լավագույն մարզավիճակում մասնակցությունն ապահովելու անհրաժեշտությունից։
«Որոշման ընդունման դեպքում ակնկալվում են տարբեր տարիքային խմբերի Եվրոպայի և աշխարհի առաջնություններում մեդալների նվաճում, մարզական արդյունքների աճ»,- ասաց փոխնախարարը։
Խզմալյանը նաև հայտնեց, որ լրացուցիչ ֆինանսավորմամբ ֆեդերացիաները ՀՀ-ում կկազմակերպեն միջազգային մրցաշարեր և առաջնություններ, ուսումնամարզական հավաքներ, կմասնակցեն նաև միջազգային մրցաշարերի, կավելացվի Եվրոպայի և աշխարհի առաջնություններում Հայաստանը ներկայացնող մարզիկների թիվը:
ՀՀ վարչապետի աշխատակազմի ղեկավար Արայիկ Հարությունյանը պարզաբանեց, որ այս լրացուցիչ ֆինանսավորմամաբ պետությունն, ըստ էության, վերականգնում է մարզական ֆեդերացիաների ֆինանսավորման՝ 2020-21թթ-ին պարտադրված կրճատված գումարները։
ՀՀ վարչապետը կարևորեց մարզական կազմակերպությունների ոչ միայն արդյունավետ, այլև ժամանակին ֆինանսավորման անհրաժեշտությունը։
«Մենք չպիտի սպասենք՝ Օլիմպիական խաղերից 6 ամիս առաջ տեսնենք, ծանրաձող չկա, բոթաս չկա, պայուսակ չկա, բենզինը պետք է ճարենք մի տեղից։ Դա պետք է նախապես պլանավորված բնականոն աշխատանքի մի մաս լինի, և ոչ թե մտածենք` ոնց անենք, որ վերջին պահին մի տեղից մի բան ճարենք։ Վատնումը միայն այն չէ, որ աննպատակ ծախսում ես, այլև այն, որ գումարը ճիշտ ժամանակին չի ծախսվում,- ասաց Փաշինյանը։
Նշենք, որ կառավարության ընդունած որոշմամբ, Հայաստանի բասկետբոլի ֆեդերացիան կստանա 17 մլն դրամ, Բռնցքամարտի ֆեդերացիան` 30, Ըմբշամարտի ֆեդերացիան` 62, Լողի հայկական դաշնությունը` 2, Ծանրամարտի ֆեդերացիան` 35, Հրաձգության ֆեդերացիան՝ 5 մլն, Հայաստանի ձյուդոյի ֆեդերացիան` 18, Մարմնամարզության ֆեդերացիան` 20, Սուսերամարտի ֆեդերացիան` 5, Վոլեյբոլի ֆեդերացիան` 2 և Թենիսի ֆեդերացիան` 4 մլն դրամ։