ԵՐԵՎԱՆ, 24 մայիսի – Sputnik. Երևանի քաղաքապետարանը պահուստային ֆոնդից 554 մլն դրամ կհատկացնի մետրոյի «Աջափնյակ» կայարանի կառուցման հետ կապված նախագծային աշխատանքների համար։ Համապատասխան որոշումն ընդունվեց Երևանի ավագանու նիստում՝ 37 կողմ, 1 դեմ, 4 ձեռնպահ ձայներով։
Ինչպես նիստի ժամանակ պարզաբանեց Երևանի փոխքաղաքապետ Լևոն Հովհաննիսյանը, սա մետրոպոլիտենի կառուցման հերթական փուլն է։
Քաղաքապետարանը նախագիծը կարևոր է համարում Երևանի տրանսպորտային համակարգի բեռնաթափման առումով։ Երևանի փոխքաղաքապետ Ստեփան Մաչյանը նշեց, որ ընդհանուր առմամբ նախագիծը Երևան քաղաքի համար կարժենա 30-100 մլն դոլար։ Վերջնական գումարային ծախսը հայտնի կդառնա առաջիկայում։
Հիշեցնենք, որ ավելի վաղ Երեւանի նախկին գլխավոր ճարտարապետ Արթուր Մեսչյանը հայտնել էր, որ մետրոյի նոր կայարանը կլինի Հրազդան գետի վրա կառուցվելիք կամրջի վրա: Նախագծի ինքնարժեքը չէր նշվել։ Քաղաքապետարանի կողմից դիտարկվող բիզնես-ծրագիրը նախատեսում էր երկու բաղադրիչ՝ «Աջափնյակ» մետրոյի կայարանի հարևանությամբ առևտրի կենտրոնի կառուցում և հարակից տարածքում հնացած բնակարանային ֆոնդի թարմացում։
Քաղաքապետարանի ծրագրով՝ 525 մետր երկարությամբ մետրոյի նոր կայարան տանող ճանապարհը պետք է անցնի թունելով, որի շինարարությունը սկսվել է դեռ ԽՍՀՄ տարիներին ու անավարտ էր մնացել: Նախագծում կա մետրոյի շարունակությունը Դավթաշենից դեպի մայրաքաղաքի հյուսիս-արևմտյան շրջան։