ԵՐԵՎԱՆ, 23 մայիսի – Sputnik. Երևանի քաղաքապետարանը մտադիր է վերանորոգել, վերազինել ու արդիականացնել Երևանի Հանրապետության հրապարակի շատրվանների գունաերաժշտական համակարգը։ Համապատասխան որոշման նախագիծը հրապարակվել է իրավական ակտերի նախագծերի հանրային հարթակում։
Քաղաքապետարանը որոշել է նոր համակարգը ձեռք բերել ֆրանսիական այն նույն ընկերությունից, որը 11 տարի առաջ տեղադրել էր նաև գործող համակարգը։
«Շատրվանների գունաերաժշտական համակարգը, որը տեղադրվել է 17․07․2011թ․ Aquatique-show կազմակերպության կողմից, գտնվում է տեխնիկապես վատ վիճակում, ինչի հետևանքով պարբերաբար խափանվում է, և յուրաքանչյուր պահի շահագործումը կարող է դառնալ անհնարին, ուստի ունի արդիականացման, վերազինման և վերանորոգման կարիք»,- նշվում է որոշման նախագծում։
«Aquatique-show» կազմակերպության աշխատանքային խմբի ուսումնասիրություններից հետո համակարգի արդիականացման գործընթացը նախնական գնահատվել է 675 000 եվրո։ Արդիականացման արդյունքում հնացած լուսարձակները փոխարինվելու են ԼED լուսարձակներով, գունաերաժշտության համակարգը շահագործող համակարգչային կենտրոնի մաշված սարքավորումներն ու պահեստամասերը նորոգվելու կամ փոխարինվելու են նոր պահեստամասերով, խափանված DVD պրոյեկտորի փոխարեն տեղադրվելու է նորը՝ ջրային էկրանին տեսահոլովակներ ցուցադրելու համար:
Նախքան պայմանագիրը կնքելը նախատեսվում է «Aquatique-show» կազմակերպության մասնագիտական խմբի այցը Հայաստան, որից հետո կներկայացվի սարքավորումների ձեռքբերման և աշխատանքների վերջնական արժեքը։