«Դիմադրություն» շարժման անդամներն ու նրանց կողմնակիցները Ֆրանսիայի հրապարակից երթ սկսեցին։ Նրանք Բաղրամյան պողոտայով շարժվեցին դեպի Պռոշյան փողոց։
Երթի մասնակիցները պատրաստվում են հասնել կառավարական ամառանոցներին, որտեղ ներկայացնելու են Հայաստանի և Արցախի իրական ու արժանապատիվ խաղաղությանը հասնելու շուրջ իրենց պատկերացումները։
«Առանց Նիկոլ Հայաստա՛ն». վանկարկեցին նրանք մինչ երթի մեկնարկը։
Երթի ընթացքում տարբեր քաղաքացիներ պատշգամբներից իրենց աջակցությունն էին հայտնում ընդդիմադիրներին։
Նշենք, որ կառավարական ամառանոցներից շարժման անդամները վերադառնալու են Ֆրանսիայի հրապարակ` շարունակելու հանրահավաքը։
Հիշեցնենք` Հայաստանում բողոքի ալիք բարձրացավ ՀՀ վարչապետ Նիկոլ Փաշինյանի` Արցախի վերաբերյալ հայտարարությունից հետո։
Ապրիլի 22-ին ԱԺ փոխխոսնակ, «Հայաստան» խմբակցության անդամ Իշխան Սաղաթելյանը հայտարարեց վարչապետ Նիկոլ Փաշինյանին և նրա թիմին իշխանությունից հեռացնելու փողոցային պայքարի մեկնարկի մասին։
Մայիսի 1-ին Երևանի Ֆրանսիայի հրապարակում մեկնարկեց ընդդիմության բազմահազարանոց հանրահավաքը։ Մասնակիցները վրաններ ու բարիկադներ տեղադրեցին, Իշխան Սաղաթելյանը հայտարարեց, որ մայիսի 2-ից սկսում են անհնազանդության ակցիաներ՝ փակելով փողոցները։
Մայիսի 2-ից սկսած` ամեն օր Երևանում կազմակերպվում են անհնազանդության երթեր ու հանրահավաքներ, այլ միջոցառումներ։