ԵՐԵՎԱՆ, 20 մայիսի – Sputnik. Երևանի ընդհանուր իրավասության Կենտրոն և Նորք Մարաշ դատարանի դատավոր Կարեն Ֆարխոյանը մերժեց «Հայաստան» դաշինքի անդամ, «Այլընտրանք» ՀԿ ղեկավար Նարեկ Մանթաշյանի խափանման միջոց կալանավորումը փոխելու վերաբերյալ միջնորդությունը։
Երեկվա դատական նիստի ընթացքում պատգամավորներն անձնական երաշխավորություն էին ներկայացրել` կալանքը փոխելու համար։
Փաստաբան Ալեքսանդր Կոչուբաևը «Ֆեյսբուքի» իր էջում գրել է, որ կանխատեսելի էր Ֆարխոյանի նման որոշումը։
Կոչուբաևը նաև հայտնել է, որ տևական ժամանակ է, ինչ Մանթաշյանի առողջական վիճակը վատացել է։
Հիշեցնենք, որ ըստ մեղադրական եզրակացության` Մանթաշյանը օրենքով չնախատեսված կարգով, առանց դատավոր Աննա Դանիբեկյանի համաձայնության, գիտակցելով, որ խախտում է վերջինիս անձնական կյանքի գաղտնիությունը, 2020 թվականի ապրիլի 9-ին «Հայելի» ակումբում ասուլիսի ժամանակ հրապարակել է Դանիբեկյանի քթի վիրահատության մասին տեղեկությունը:
1 տարի անց` 2021 թվականի հունիսի 26-ին, Մանթաշյանը «Ֆեյսբուքի» իր էջում գրել է, որ չնայած քննության արդյունքում վերոհիշյալ քրգործի կասեցման որոշում էր կայացվել, սակայն «հետընտրական Հայաստանի քաղաքական հետապնդումների համատեքստում գործը վերաբացվել է»։
Նշենք` 2021-ի դեկտեմբերին Նարեկ Մանթաշյանի պաշտպան Ալեքսանդր Կոչուբաևը հայտարարել էր, որ Մանթաշյանի դեմ քրգործերից մեկն էլ առնչվում է այն դեպքին, երբ վարչապետ Նիկոլ Փաշինյանը 2020-ի նոյեմբերի 9-ին ստորագրեց եռակողմ հայտարարությունը, և բողոքի ակցիաներ սկսվեցին։
Նրա փոխանցմամբ, Մանթաշյանին վերագրվել է դրոշի կողոպուտի մեղադրանք, չնայած, որ վերջինս կառավարության շենքում ծածանել է ՀՀ դրոշը։