ԵՐԵՎԱՆ, 19 մայիսի – Sputnik. Արցախյան 44-օրյա պատերազմում զոհվածների ծնողներն ուզում են հանդիպել ՀՀ վերաքննիչ քրեական դատարանի նախագահ Տիգրան Սահակյանի հետ։
Վերաքննիչ քրեական դատարանում այսօր քննվում էր ՀՀ վարչապետ Նիկոլ Փաշինյանի դեմ քրեական գործ չհարուցելու որոշման դեմ բողոքը, որը ներկայացրել են «Հայաստան» խմբակցության պատգամավոր Արծվիկ Մինասյանն ու փաստաբան Հակոբ Մարտիրոսյանը։ Նրանք վիճարկում են Նիկոլ Փաշինյանի դեմ պետական դավաճանության հիմքով քրեական գործ չհարուցելու՝ Առաջին ատյանի դատարանի որոշումը։
Զոհվածներից մեկի մայրը` տիկին Անահիտը, լրագրողների հետ զրույցում ասաց, որ իրենք դիմում են ներկայացնելու, որով խնդրելու են մայիսի 23-ին (այդ օրը նշանակված է հաջորդ նիստը) դատավոր Կարեն Բիշարյանին ազատել բոլոր դատական նիստերից, որպեսզի կարողանա քննել միայն իրենց գործը։
«Հաշվի առնելով գործի կարևորությունը և տուժողների իրավահաջորդների ծանր հոգեբանական վիճակը` դիմում ենք դատարանի նախագահին, որպեսզի Բիշարյանին ժամանակ տրամադրվի մինչև նշված աշխատանքային օրվա ավարտը։ Սա դիմում է, և մեզ կարող են անհապաղ պատասխանել»,– նշեց տիկին Անահիտը։
Զոհվածի մայրը տեղեկացրեց, որ հանդիպման պահանջը ներկայացրել են դատարանի նախագահի օգնականին, նա հայտնել է, որ Սահակյանն այդ պահին նիստի է, սակայն հնարավոր է` հանդիպի ծնողների հետ։
Հիշեցնենք` այսօր մեկնարկած նիստը հետաձգվեց, քանի որ դատական դահլիճում մեկ այլ գործի քննություն էր նախատեսված։ Հաջորդ նիստը կայանալու է մայիսի 23-ին` ժամը 13։00-ին։