ԵՐԵՎԱՆ, 18 մայիսի – Sputnik. «Դիմադրություն» շարժումը Ֆրանսիայի հրապարակում կազմակերպած հանրահավաքից հետո երթ սկսեց դեպի ՀՀ ոստիկանության շենք։
«Դիմադրություն» շարժումը Ֆրանսիայի հրապարակում կազմակերպած հանրահավաքից հետո երթ սկսեց դեպի ՀՀ ոստիկանության շենք։
© Sputnik / Asatur Yesayants
Շարժման անդամ, ՀՀ ԱԺ փոխխոսնակ Իշխան Սաղաթելյանը հայտնեց, որ իրենք հատուկ պահանջներ են պատրաստվում ներկայացնել ՀՀ ոստիկանապետին։
«Դիմադրություն» շարժումը պահանջում է անհապաղ կասեցնել բոլոր այն ոստիկանների լիազորությունները, որոնք այսօր և երեկ գործել են ապօրինի։ Նրանք բոլորը պետք է ենթարկվեն պատասխանատվության։ Պետք է նաև սկսվի իրավական գործընթաց` պարզելու հանցագործություն կատարած ոստիկաններին հանձնարարություններ ու երաշխիքներ տված անձանց անունները։ Երրորդ պահանջն էլ այն է, որ ոստիկանապետը հանդես գա հրապարակային գնահատականով` այս վայրագրությունների վերաբերյալ»,- ասաց Սաղաթելյանը։
Նրա խոսքով` պետք է բացառվի որևէ անհամաչափ կամ բռնի գործողություն ՀՀ քաղաքացիների նկատմամբ։
Հիշեցնենք` Հայաստանում բողոքի ալիք բարձրացավ ՀՀ վարչապետ Նիկոլ Փաշինյանի` Արցախի վերաբերյալ հայտարարությունից հետո։
Ապրիլի 22-ին ԱԺ փոխխոսնակ, «Հայաստան» խմբակցության անդամ Իշխան Սաղաթելյանը հայտարարեց վարչապետ Նիկոլ Փաշինյանին և նրա թիմին իշխանությունից հեռացնելու փողոցային պայքարի մեկնարկի մասին։
Մայիսի 1-ին Երևանի Ֆրանսիայի հրապարակում մեկնարկեց ընդդիմության բազմահազարանոց հանրահավաքը։ Մասնակիցները վրաններ ու բարիկադներ տեղադրեցին, Իշխան Սաղաթելյանը հայտարարեց, որ մայիսի 2-ից սկսում են անհնազանդության ակցիաներ՝ փակելով փողոցները։
Մայիսի 2-ից սկսած` ամեն օր Երևանում կազմակերպվում են անհնազանդության ակցիաներ, երթեր ու հանրահավաքներ։