ԵՐԵՎԱՆ, 18 մայիսի – Sputnik․ Այսօր առավոտից, ժամը 10։30-ի դրությամբ ոստիկանության բաժիններ բերման են ենթարկվել 277 քաղաքացիներ։ Այս մասին Sputnik Արմենիային հայտնեց ոստիկանության լրատվական ծառայությունից։
Նշենք, որ, ըստ բերման ենթարկվածների հայտնած տեղեկությունների, Երևանի փողոցներից ակցիաների մասնակիցներին տեղափոխում են ոչ միայն մայրաքաղաքի ոստիկանական բաժանմունքներ, այլև հարակից մարզերի` Արտաշատի, Աբովյանի և Հրազդանի բաժիններ:
Մայիսի 17-ին այս տեղեկությունները հաստատել էր նաև ՀՀ ՄԻՊ Քրիստինե Գրիգորյանը։ Երեկոյան հրապարակած տեղեկատվության մեջ նա նշել էր, որ բերման ենթարկվածների մի մասին տեղափոխել են Արարատի մարզի Մասիս և Արագածոտնի մարզի Աշտարակ քաղաքի բաժիններ։
Հիշեցնենք, որ պաշտոնական տվյալներով, երեկ Երևանում բերման է ենթարկվել 417 քաղաքացի, ընդդիմության հայտնած տվյալներով` շուրջ 600։
Հայտնել ենք, որ «Դիմադրություն» շարժումն այսօր վաղ առավոտից սկսել է անհնազանդության ակցիաները` Երևանի տարբեր փողոցներում երթևեկությունը կաթվածահար անելով։
Մայիսի 2-ից սկսած` ամեն օր Երևանում կազմակերպվում են անհնազանդության ակցիաներ, երթեր ու հանրահավաքներ։ Մասնակիցները պահանջում են ՀՀ վարչապետ Նիկոլ Փաշինյանի հրաժարականը։