ԵՐԵՎԱՆ, 17 մայիսի – Sputnik. Ոստիկանները Պուշկին–Սարյան խաչմերուկից բերման են ենթարկել ՀՀ ԶՈւ ԳՇ նախկին պետ, գեներալ–գնդապետ Յուրի Խաչատուրովի որդուն` Իգոր Խաչատուրովին։
Այդ հատվածում «Դիմադրություն» շարժման անդամներն ու դրա կողմակիցները անհնազանդության ակցիաներ էին իրականացնում, փողոց փակում։ Ոստիկանները Պուշկին–Սարյան խաչմերուկից մի շարք քաղաքացիների նույնպես բերման ենթարկեցին։
Հիշեցնենք, որ ՀՀ երկրորդ նախագահ Ռոբերտ Քոչարյանի որդին` Լևոն Քոչարյանը, ոստիկանական ավտոբուսի միջից «լայվ» էր մտել ու հայտնել, որ իրենց տարել են Զեյթունի բաժանմունք, սակայն այնտեղ տեղ չկար։
Ավելի ուշ Քոչարյանը կրկին «լայվ» էր մտել ու ասել` հիմա էլ Էրեբունու բաժանմունք են բերել, սակայն այնտեղ էլ տեղ չկա։
Հայաստանում բողոքի ալիք բարձրացավ ՀՀ վարչապետ Նիկոլ Փաշինյանի` Արցախի վերաբերյալ հայտարարությունից հետո։
Ապրիլի 22-ին ԱԺ փոխխոսնակ, «Հայաստան» խմբակցության անդամ Իշխան Սաղաթելյանը հայտարարեց վարչապետ Նիկոլ Փաշինյանին և նրա թիմին իշխանությունից հեռացնելու փողոցային պայքարի մեկնարկի մասին։
Մայիսի 1-ին Երևանի Ֆրանսիայի հրապարակում մեկնարկեց ընդդիմության բազմահազարանոց հանրահավաքը։ Մասնակիցները վրաններ ու բարիկադներ տեղադրեցին, Իշխան Սաղաթելյանը հայտարարեց, որ մայիսի 2-ից սկսում են անհնազանդության ակցիաներ՝ փակելով փողոցները։
Մայիսի 2-ից սկսած` ամեն օր Երևանում կազմակերպվում են անհնազանդության ակցիաներ, երթեր ու հանրահավաքներ։