Ոստիկաններն Ամիրյան–Մաշտոց խաչմերուկում բերման ենթարկեցին ակցիայի մասնակիցներին

Ոստիկանները, Երևանի Մաշտոց–Ամիրյան խաչմերուկում ուժ կիրառելով, բերման ենթարկեցին «Դիմադրություն» շարժման անդամների և նրանց կողմնակիցների մի մասին։

Ակցիայի մասնակիցները սկզբում փակել էին փողոցը, ինչից հետո առանց որևէ բան ասելու ոստիկանները բերման ենթարկեցին։

Ընդդիմադիրները բողոքի ակցիաները վերսկսել են ժամը 08։00-ից։

Հիշեցնենք` Հայաստանում բողոքի ալիք բարձրացավ ՀՀ վարչապետ Նիկոլ Փաշինյանի` Արցախի վերաբերյալ հայտարարությունից հետո։

Ապրիլի 22-ին ԱԺ փոխխոսնակ, «Հայաստան» խմբակցության անդամ Իշխան Սաղաթելյանը հայտարարեց վարչապետ Նիկոլ Փաշինյանին և նրա թիմին իշխանությունից հեռացնելու փողոցային պայքարի մեկնարկի մասին։

Մայիսի 1-ին Երևանի Ֆրանսիայի հրապարակում մեկնարկեց ընդդիմության բազմահազարանոց հանրահավաքը։ Մասնակիցները վրաններ ու բարիկադներ տեղադրեցին, Իշխան Սաղաթելյանը հայտարարեց, որ մայիսի 2-ից սկսում են անհնազանդության ակցիաներ՝ փակելով փողոցները։

Մայիսի 2-ից սկսած` ամեն օր Երևանում կազմակերպվում են անհնազանդության ակցիաներ, երթեր ու հանրահավաքներ։