ԵՐԵՎԱՆ, 16 մայիսի – Sputnik. Թուրքիայի էկոնոմիկայի նախկին նախարար, ընդդիմադիր «Ժողովրդավարություն և առաջընթաց» կուսակցության ղեկավար Ալի Բաբաջանը զգուշացրել է, որ երկրում հիպերգնաճի լուրջ վտանգ կա։ Նրա խոսքով` Թուրքիան քրոնիկ գնաճի ժամանակաշրջանում է հայտնվել։
«Եթե նրանք (իշխանությունը. խմբ.) շարունակեն առանց որևէ ծրագրի փող տպել, Թուրքիան հիպերգնաճի փուլ կմտնի։ Զգուշացնում եմ՝ այս ազգին վատություն մի արեք։ Որքան շատ գումար եք տպում, այնքան ավելի շատ եք նվազեցնում փողի արժեքը», - ասել է քաղաքական գործիչը։ Նրա խոսքը մեջբերում է «Sözcü» թերթը:
Ընդդիմադիրը խոստացել է, որ 2023 թվականի ընտրությունների արդյունքում իշխանության գալու դեպքում ինքը կկարողանա նվազագույնի հասցնել գնաճը:
«Մենք գնաճը կհասցնենք միանիշ թվի։ Նախկինում արել ենք, էլի կանենք։ Մենք կես տարում կհաղթահարենք ճգնաժամը»,- վստահեցրել է Թուրքիայի էկոնոմիկայի նախկին նախարարը։
Պաշտոնական տվյալների համաձայն՝ Թուրքիայում գնաճի մակարդակը ապրիլին հասել է 69,97%–ի, մեկ ամիս առաջ 61,14% է կազմել: Գնաճի ֆոնինթուրքական լիրայի փոխարժեքը մայիսի սկզբից գրեթե 5%-ով նվազել է ամերիկյան դոլարի նկատմամբ։