Երևանի Մյասնիկյան պողոտայով ընդդիմության ավտոերթին մասնակցողներից մեկի նկատմամբ պարեկային ծառայության աշխատակիցները արձանագրություն կազմեցին։
Այդ անձի մեքենայի բեռնախցիկից ամրացված ՀՀ դրոշի մի հատվածը քամու պատճառով փակել էր պետհամարանիշը, ինչը ոստիկանությունն արձանագրեց որպես խախտում։
Ոստիկանությունը 25 հազար դրամ տուգանք նշանակեց քաղաքացուն, վերջինս էլ հրաժարվեց ստորագրել արձանագրության տակ և նշեց, որ կբողոքարկի։
Այլ մի քանիսին բերման ենթարկեցին` նրանցից մեկի նկատմամբ էլ բիրտ ուժ կիրառելով։
Ավտոերթի այլ անդամներ զուգահեռ վանկարկում էին` «Նիկո՛լ, դավաճա՛ն», ինչպես նաև ազդանշաններ տալիս։
Այսօր վաղ առավոտից նախատեսված անհնազանդության ակցիաները ժամը 08։00-ից մեկնարկել են Երևան մտնող հիմնական մայրուղիներից` Աշտարակի, Արգավանդի, Արտաշատի, Սևանի և Արինբերդի ավտոճանապարհներից։
Հիշեցնենք` Հայաստանում բողոքի ալիք բարձրացավ ՀՀ վարչապետ Նիկոլ Փաշինյանի` Արցախի վերաբերյալ հայտարարությունից հետո։ Ապրիլի 13-ին խորհրդարանում նա ափսոսանք հայտնեց, որ 2018-2019 թվականներին ժողովրդին չի ասել, որ «մեր բոլոր հեռու և մոտիկ բարեկամները մեզնից ակնկալում են, որ մենք այս կամ այն կոնֆիգուրացիայով Ադրբեջանին հանձնենք 7 հայտնի շրջանները և իջեցնենք Արցախի կարգավիճակի համար մեր սահմանած նշաձողը»։
Ապրիլի 22-ին ԱԺ փոխխոսնակ, «Հայաստան» խմբակցության անդամ Իշխան Սաղաթելյանը հայտարարեց վարչապետ Նիկոլ Փաշինյանին և նրա թիմին իշխանությունից հեռացնելու փողոցային պայքարի մեկնարկի մասին։
Մայիսի 1-ին Երևանի Ֆրանսիայի հրապարակում մեկնարկեց ընդդիմության բազմահազարանոց հանրահավաքը։ Մասնակիցները վրաններ ու բարիկադներ տեղադրեցին, Իշխան Սաղաթելյանը հայտարարեց, որ մայիսի 2-ից սկսում են անհնազանդության ակցիաներ՝ փակելով փողոցները։
Մայիսի 2-ից սկսած` ամեն օր Երևանում կազմակերպվում են անհնազանդության ակցիաներ, երթեր ու հանրահավաքներ։