ԵՐԵՎԱՆ, 13 մայիսի – Sputnik. Երևան քաղաքի ընդհանուր իրավասության դատարանը որոշում է կայացրել որպես խափանման միջոց կալանք չկիրառել ոստիկանության մայոր Արամ Նավասարդյանի նկատմամբ։ Տեղեկությունը Sputnik Արմենիայի հետ զրույցում հայտնեց ՀՀ քննչական կոմիտեի մամուլի քարտուղար Վարդան Թադևոսյանը։
Նա տեղեկացրեց նաև, որ Արամ Նավասարդյանի նկատմամբ որպես խափանման միջոց է ընտրվել ստորագրությունը չհեռանալու մասին։
Դատավոր Ռազմիկ Մարիկյանը մերժել է Նավասարդյանին կալանավորելու` տուժող կողմի միջնորդությունը։
Նշենք, որ փաստաբան Րաֆֆի Ասլանյանը երեկ հայտնել էր` դեպքի առթիվ հարուցված քրեական գործով վարույթի ընթացքում ներկայացնելու է Սոնա Մնացականյանի հոր շահերը, որը տուժողի իրավահաջորդն է։
Ասլանյանը հայտնել էր նաև, որ գործով մեղադրյալը ձերբակալվել է, նրան կալանավորելու միջնորդություն են ներկայացրել։
Հիշեցնենք` ապրիլի 26-ին` ժամը 18:05-ի սահմաններում, Երևանի Լեո-Պարոնյան փողոցների խաչմերուկի մոտ ոստիկանության ՃՈ ծառայության ուղեկցող սպայական վաշտի հրամանատարը «Տոյոտա Պրադո» մեքենայով վրաերթի էր ենթարկել հղի կնոջ։ Նա տեղափոխվել էր «Նաիրի» բժշկական կենտրոն, որտեղ, գիտակցության չգալով, մահացել էր։
Վարորդը դեպքից հետո թողել էր պատահարի վայրը և հեռացել, սակայն ժամը 20:05-ին վերադարձել էր և մասնակցել քննչական գործողություններին:
Ավելի ուշ հայտնի դարձավ, որ վրաերթի ենթարկվածը Սոնա Մնացականյանն է, որն աշխատում էր «Support Our Heroes-Armenia» («Աջակցենք մեր հերոսներին-Հայաստան») կազմակերպությունում:
Մահվան ելքով վրաերթի գործով ոստիկանության «Ճանապարհային ոստիկանություն» ծառայության ուղեկցող սպայական վաշտի հրամանատարը ձերբակալվել էր, բայց հետո ստորագրությամբ ազատ էր արձակվել։