ԵՐԵՎԱՆ, 13 մայիսի – Sputnik. ՀՅԴ–ական ևս երեք երիտասարդի են կալանավորել։ Տեղեկությունն իր ֆեյսբուքյան էջում հայտնել է «Դիմադրություն» շարժման անդամ Իշխան Սաղաթելյանը։
Երեկ հայտնել էինք, որ կալավորվել են ՀՅԴ–ական Արսեն Մարտոյանն ու Գերասիմ Վարդանյանը։ Արսենը կալանավորվել է Գյումրիում տարեց տղամարդկանց նկատմամբ բռնություն գործադրելու դեպքով հարուցված քրգործով, իսկ Գերասիմը` դեռ 2020-ի նոյեմբերի 9-ին տեղի ունեցած իրադարձությունների համար։
«Իմ ընկերները` Տարոն Մանուկյանը, Գոռ Սարգսյանը, Արսեն Մարտոյանը, Գերասիմ Վարդանյանը, Գոռ Մաթևոսյանը շինծու գործերով այս պահին նրանք կալանավորված են։ Խղճուկնե'ր, եթե ձեզ թվում է՝ կարող եք նման քայլերով մեզ լռեցնել, սխալվում եք։ Այս տղերքը վաղուց երդվել են ծառայել Հայաստանի և հայության ազատագրության դատին։ Եթե հարկ լինի` նաև կյանքի գնով։ Հետևաբար, դուք չեք կարող լռեցնել նրանց»,–գրել է Սաղաթելյանը։
Նրա խոսքով` պայքարը ենթադրում է նաև դիմանալ հալածանքներին, սադրանքների չտրվել, գնալ զոհողությունների…
Սաղաթելյանը հիշեցրել է, որ այսօր, ժամը 16։00-ին Ֆրանսիայի հրապարակում հանրահավաք է կայանալու։
Հիշեցնենք, որ կալանավորված երեք երիտասարդներն էլ անցնում են Գյումրիում տարեց տղամարդկանց նկատմամբ բռնություն գործադրելու դեպքով հարուցված քրգործով։
Ավելի վաղ ՔԿ-ից հայտնել էին, որ 2022 թվականի մայիսի 8-ին մի խումբ երիտասարդներ, իջնելով ավտոմեքենայից, մոտեցել են Գյումրու Երևանյան խճուղում գտնվող հասարակական տրանսպորտի կանգառում կանգնած տարեց տղամարդկանց և սկսել հարվածներ հասցնել նրանց մարմնի տարբեր մասերին: