ԵՐԵՎԱՆ 13 մայիսի – Sputnik. Հայաստանի Հանրապետության արտաքին գործերի նախարարության և Չեռնոգորիայի արտաքին գործերի նախարարության միջև համագործակցության մասին փոխըմբռնման հուշագիր է ստորագրվել։ Տեղեկությունը հայտնում է ՀՀ ԱԳՆ մամուլի ծառայությունը։
Նշվում է, որ Հայաստանի պատվիրակությունը գլխավորել են ԱԳՆ Եվրոպայի վարչության պետ Տիգրան Սամվելյանը, Չեռնոգորիաինը՝ երկկողմ հարաբերությունների, տնտեսական և մշակութային դիվանագիտության գլխավոր տնօրենության գլխավոր տնօրեն Չեդոմիր Ֆուշտիչը։ ՀՀ պատվիրակության կազմում է եղել նաև Չեռնոգորիայում ՀՀ դեսպան Աշոտ Հովակիմյանը (նստավայրը՝ Պրահա)։
Կողմերը քննարկել են նաև երկկողմ հարաբերությունները խորացնելու և ամրապնդելու հնարավորությունները, տնտեսական կապերի աշխուժացմանը, առևտրաշրջանառության ծավալների մեծացմանն ուղղված գործնական քայլերը։
Ընդգծվել է, որ Լեռնային Ղարաբաղի հակամարտությունը պետք է լուծվի բացառապես խաղաղ ճանապարհով՝ ԵԱՀԿ Մինսկի խմբի համանախագահության շրջանակում։
Չեռնոգորիայի արտաքին գործերի նախարարությունում հայկական պատվիրակությունը հանդիպում է ունեցել նաև ՆԱՏՕ-ի և անվտանգության քաղաքականության հարցերով գլխավոր տնօրեն Վլադիմիր Վուչինիչի հետ։ Քննարկվել են տարածաշրջանային անվտանգությանն առնչվող հարցեր։
Նույն օրը ՀՀ պատվիրակությունը հանդիպում է ունեցել նաև Չեռնոգորիայի նախագահի խորհրդական Թամարա Բրայովիչի հետ։ Անդրադարձ է կատարվել բարձր մակարդակով քաղաքական երկխոսության հաստատման կարևորությանը, ինչպես նաև երկկողմ միջպետական հարաբերությունների խորացմանն առնչվող հարցերի լայն շրջանակին։