Ոստիկանները Երևանի Աբովյան-Արամի փողոցների խաչմերուկում խաղաղ ցույցի դուրս եկած քաղաքացիների մի մասին բերման ենթարկեցին։
Լրագրողների հարցերին, թե ինչ հիմքով են նրանց բերման ենթարկում, ոստիկանները չարձագանքեցին։
«Խաղաղ երթի մասնակիցներին առաջարկվել է տարանցիկ ճանապարհ, սակայն նրանք չհամաձայնեցին։ Պարեկային ոստիկանությունն է որոշում երթի ուղղությունը»,- նշեց ՀՀ փոխոստիկանապետ Կամո Ցուցուլյանը։
Ոստիկանական մեքենաները Հանրապետության հրապարկում
© Sputnik / Asatur Yesayants
Ընդդիմությունն այսօր ժամը 12։00-ից Երևանում ավտոերթեր է անցկացնում 4 տարբեր ուղղություններով։ Տրանսպորտային միջոցներին ամրացված են Հայաստանի և Արցախի դրոշները։ Ժամը 16։00-ին ավտոերթի մասնակիցները պետք է հասնեն Ֆրասնիայի հրապարակ, սակայն դեպի Հանրապետության հրապարակ մտնող բոլոր փողոցները ոստիկանները փակել էին։
Աբովյան-Պուշկին փողոցների խաչմերուկում երթի մասնակիցներն անցան ոստիկանության մեքենայի կողքով, սակայն Աբովյան-Արամի փողոցների խաչմերուկում արդեն մի քանի ոստիկանական մեքենա էր կանգնած։ Քաղաքացիները սկսեցին պահանջել, որ իրենց առջև ճանապարհը բացեն, ինչը իրավապահ մարմինները չարեցին։
«Հայաստան» խմբակցության պատգամավոր Լիլիթ Գալստյանն ընդգծեց, որ ոչ մի փաստաթուղթ ոստիկանները ցույց չեն տվել և առանց իրավական հիմքի են իրենց առջև փակել փողոցները։
«Խախտվում են խաղաղ երթ իրականացնելու մեր իրավունքները։ Այս պահին էլ բերման ենթարկեցին վարորդներին, որոնց մեքենաներն այժմ մնացին փողոցի մեջտեղում։ Ըստ էության, իրենք արհեստական խցանում ստեղծեցին»,- ասաց Գալստյանը։ Ոստիկանությունն ավտոքարշակ բերեց, որպեսզի սկսեն հեռացնել փողոցում մնացած մեքենաները։
Հիշեցնենք` Հայաստանում բողոքի ալիք բարձրացավ ՀՀ վարչապետ Նիկոլ Փաշինյանի` Արցախի վերաբերյալ հայտարարությունից հետո։
Ապրիլի 22-ին ԱԺ փոխխոսնակ, «Հայաստան» խմբակցության անդամ Իշխան Սաղաթելյանը հայտարարեց վարչապետ Նիկոլ Փաշինյանին և նրա թիմին իշխանությունից հեռացնելու փողոցային պայքարի մեկնարկի մասին։
Մայիսի 1-ին Երևանի Ֆրանսիայի հրապարակում մեկնարկեց ընդդիմության բազմահազարանոց հանրահավաքը։ Մասնակիցները վրաններ ու բարիկադներ տեղադրեցին, Իշխան Սաղաթելյանը հայտարարեց, որ մայիսի 2-ից սկսում են անհնազանդության ակցիաներ՝ փակելով փողոցները։
Մայիսի 2-ից սկսած` ամեն օր Երևանում կազմակերպվում են անհնազանդության ակցիաներ, երթեր ու հանրահավաքներ։