Երևանի Ֆրանսիայի հրապարակից քիչ առաջ մեկնարկեց «Դիմադրություն» շարժման արդեն ավանդական դարձած երեկոյան երթը։
Ինչպես հայտարարեց շարժման անդամ Իշխան Սաղաթելյանը, երթով անցնելու են Սարյան փողոցով։
Մինչ երթի մեկնարկը Սաղաթելյանն անդրադարձավ Ադրբեջանի ԱԳ նախարարության այսօրվա հայտարարությանը, որը վերաբերում է այսպես կոչված անկլավներին։
«Ադրբեջանի ԱԳ նախարարությունը հանդես է եկել հայտարարությամբ, որտեղ կրկին ասում է, որ Տավուշի, Վայոց Ձորի մարզերում կան հողեր և օրվա իշխանության հետ կա պայմանավորվածություն` այդ հողերը վեադարձնելու։ Մենք պայքարում ենք հենց դա կանխելու համար»,– ասաց Սաղաթելյանը։
Ընդդիմադիր գործիչը հայտարարեց, որ հայ ժողովրդի անվտանգության տիրույթում «Նիկոլի ու Ալիևի ցանկացած պայմանավորվածություն առ ոչինչ է»։
Ընդդիմադիր գործիչը նշեց, որ կան էլի կարևոր ուղերձներ, որոնք ինքը հանրությանը կփոխանցի արդեն երթից հետո։
Հիշեցնենք` Հայաստանում բողոքի ալիք բարձրացավ ՀՀ վարչապետ Նիկոլ Փաշինյանի` Արցախի վերաբերյալ հայտարարությունից հետո։
Ապրիլի 22-ին ԱԺ փոխխոսնակ, «Հայաստան» խմբակցության անդամ Իշխան Սաղաթելյանը հայտարարեց վարչապետ Նիկոլ Փաշինյանին և նրա թիմին իշխանությունից հեռացնելու փողոցային պայքարի մեկնարկի մասին։
Մայիսի 1-ին Երևանի Ֆրանսիայի հրապարակում մեկնարկեց ընդդիմության բազմահազարանոց հանրահավաքը։ Մասնակիցները վրաններ ու բարիկադներ տեղադրեցին, Իշխան Սաղաթելյանը հայտարարեց, որ մայիսի 2-ից սկսում են անհնազանդության ակցիաներ՝ փակելով փողոցները։
Մայիսի 2-ից սկսած` ամեն օր Երևանում կազմակերպվում են անհնազանդության ակցիաներ, երթեր ու հանրահավաքներ։
Ընդդիմությունն այսօրվա ակցիաները սկսել էր 4 ուղղություններով` Սասունցի Դավթի արձանի մոտից, Րաֆֆու փողոցից, Գայի պողոտայից և 15-րդ թաղամասից։