ԵՐԵՎԱՆ, 10 մայիսի – Sputnik. Ուկրաինայի արտգործնախարար Դմիտրի Կուլեբան հայտարարել է, որ եթե Ուկրաինան Եվրամիության անդամի թեկնածուի կարգավիճակ չստանա, դա կնշանակի, որ «Եվրոպան փորձում է խաբել» Կիևին, և Ուկրաինան դա չի հանդուրժի։ Այս մասին հայտնում է ՌԻԱ Նովոստին։
Ավելի վաղ Վլադիմիր Զելենսկին հայտարարել էր, որ Կիևը ԵՄ-ին է փոխանցել հարցաթերթի լրացված երկրորդ մասը՝ Եվրամիությանն անդամակցելու թեկնածուի կարգավիճակ ստանալու համար և հույս ունի հունիսին պատասխան ստանալ Ուկրաինայի թեկնածուի կարգավիճակի վերաբերյալ:
«Եթե մենք թեկնածուի կարգավիճակ չստանանք, դա միայն մի բան կնշանակի՝ Եվրոպան փորձում է մեզ խաբել։ Եվ մենք չենք պատրաստվում հանդուրժել դա»,-հայտարարել է Կուեբան Financial Times թերթին տված հարցազրույցում։
Մեկնաբանելով Ֆրանսիայի նախագահ Էմանուել Մակրոնի կանխատեսումն այն մասին, որ ԵՄ-ին Ուկրաինայի անդամակցության գործընթացը կարող է մի քանի տարի, նույնիսկ տասնամյակներ տևել` Կուլեբան հայտարարել է, որ Ուկրաինայի համար ամենակարևորը հունիսին թեկնածուի կարգավիճակ ստանալն է, և այդ ժամանակ արդեն հնարավոր կլինի «լուծել մնացած հարցերը՝ ինչպես, երբ և այլն»:
«Երեք ամիս առաջ այս երկիրը (Ուկրաինան՝ խմբ․) անդամության հեռանկար անգամ չուներ։ Իսկ հիմա նրանք քննարկում են, թե դա որքան ժամանակ կտևի»,-ավելացրել է Կուլեբան։
Եվրահանձնաժողովի ղեկավար Ուրսուլա ֆոն դեր Լյայենը ապրիլին Կիև կատարած այցի ժամանակ Վլադիմիր Զելենսկուն հարցաշար էր փոխանցել՝ Եվրամիությանն անդամակցելու շուրջ բանակցություններ սկսելու համար: Նա ընդգծել էր, որ փոխանցվող փաստաթուղթը «առաջիկա ամիսներին քննարկումների հիմքն է»: Ավելի ուշ Զելենսկին հայտնել էր, որ Ուկրաինայում ԵՄ ներկայացուցչության ղեկավար Մատտի Մաասիկասին է փոխանցել հարցաթերթիկի լրացված առաջին մասը: Նա հավելել էր, որ Ուկրաինան շուտով ԵՄ-ին կփոխանցի պատասխանների երկրորդ մասը։
Զելենսկին փետրվարի 28-ին ստորագրել է ԵՄ-ին Ուկրաինայի անդամակցության հայտը։ Հաջորդ օրը Եվրախորհրդարանը հավանություն է տվել Ուկրաինային թեկնածու երկրի կարգավիճակ տրամադրելու մասին բանաձևին։ Ավելի վաղ ԵՄ-ի մշտական ներկայացուցիչները պայմանավորվել էին Եվրահանձնաժողովին հանձնարարել գնահատական պատրաստել ԵՄ-ին անդամակցելու Ուկրաինայի, Վրաստանի և Մոլդովայի հայտերին։