Դատարանը բավարարեց ընդդիմադիրների պահանջը. ՀՀ հազարավոր քաղաքացիներ կազատվեն տուգանքներից

ԵՐԵՎԱՆ, 10 մայիսի – Sputnik. ՀՀ վարչական դատարանը մասնակի բավարարել է ԱԺ «Հայաստան» խմբակցության պատգմավորներ Արծվիկ Մինասյանի, Արթուր Ղազինյանի ու իրավագետ–սահմանադրագետ Վահե Գրիգորյանի համատեղ դիմումը։ Վահե Գրիգորյանն այդ մասին հայտնել է ֆեյսբուքյան իր էջում։

Sputnik Արմենիայի հետ զրույցում մեկնաբանելով դատարանի որոշումը` Վահե Գրիգորյանն ասաց, որ դատարանի որոշմամբ ՀՀ հազարավոր քաղաքացիներ կազատվեն ռազմական դրության ընթացքում հավաքներին մասնակցելու կամ կառավարության տեսակետից տարբերվող կարծիք հայտնելու համար իրենց նկատմամբ կիրառված 300-400 հազար դրամի չափով տուգանքներից։

Նշենք, որ Վարչական դատարանի կայացրած որոշմամբ ոչ իրավաչափ են ճանաչվել ՀՀ կառավարության` 2020թ. սեպտեմբերի 27-ի` ռազմական դրություն հայտարարելու մասին թիվ 1586-Ն որոշման հավելվածի 3-րդ գլխի 8-րդ և 4-րդ գլխի 9.1 կետերը, որոնք վերաբերում են ռազմական դրության ժամանակ հավաքների անցկացման ու կարծիք արտահայտելու ազատության սահմանափակումներին։

Հիշեցնենք` կառավարության որոշման վերոհիշյալ կետերն անվավեր ճանաչելու հայցով Արծվիկ Մինասյանը, Վահե Գրիգորյանն ու Արթուր Ղազինյանը դատարան էին դիմել 2020 թվականի նոյեմբերի 23-ին։

Նշենք, որ Հայաստանում ռազմական դրություն էր հայտարարվել Ադրբեջանի կողմից Արցախի նկատմամբ պատերազմ սկսելու առաջին իսկ օրը` 2020թ.–ի սեպտեմբերի 27-ին։ 2021թ.–ի մարտի 24–ին խորհրդարանը երկու ընդդիմադիր խմբակցությունների` ԼՀԿ–ի ու ԲՀԿ–ի առաջարկով դադարեցրել էր ՀՀ տարածքում ռազմական դրությունը։