ԵՐԵՎԱՆ, 9 մայիսի – Sputnik. Ռուսաստանի Զինված ուժերը հետ են մղել Կիևի ռեժիմի՝ Զմեինի կղզին գրավելու մի քանի հուսահատ փորձ, հայտնել է Ռուսաստանի պաշտպանության նախարարության պաշտոնական ներկայացուցիչ, գեներալ-մայոր Իգոր Կոնաշենկովը:
Նրա խոսքով՝ մայիսի 7-ից սկսած, Զելենսկու ուղղակի ցուցումով, Ուկրաինայի Գլխավոր շտաբը՝ ԱՄՆ-ից և Մեծ Բրիտանիայից խորհրդականների անմիջական մասնակցությամբ, Զմեինի կղզու գրավման խոշոր սադրանք է ծրագրել։ Վերջին երկու օրվա ընթացքում Կիևը մի քանի հուսահատ փորձեր է ձեռնարկել օդային և ծովային դեսանտ իջեցնելու համար այդ կղզում, որը կարևոր նշանակություն ունի Սև ծովի ջրատարածքի հյուսիսարևմտյան մասի վերահսկողությունն ապահովելու համար:
«Հակառակորդը մեծ կորուստներ է կրել։ Զմեինի կղզու շրջանում գրոհները հետ մղելու ընթացքում օդում խոցվել է չորս ուկրաինական ինքնաթիռ, այդ թվում՝ երեք Սու-24 և մեկ Սու-27, երեք Մի-8 ուղղաթիռ՝ դեսանտով, մեկ Մի-24 ուղղաթիռ»,-պատմել է գեներալը:
Նա նաև նշել է, որ երկու օրվա ընթացքում օդում խոցվել է 29 ուկրաինական անօդաչու թռչող սարք, այդ թվում՝ ութ հարվածային «Բայրաքթար ՏԲ-2», ևս չորս նույնպիսի ԱԹՍ խոցվել է այսօր ցերեկը:
«Զելենսկու անխոհեմ սադրանքի արդյունքում միայն կղզում ոչնչացվել է ավելի քան 50 ուկրաինացի դիվերսանտ։ Զմեինի կղզու ափին մնացել է զոհված ուկրաինացի զինծառայողների 24 մարմին»,- ասել է Կոնաշենկովը։
Բացի այդ, գեներալ-մայորի խոսքով, մայիսի լույս 8-ի գիշերը դեսանտ իջեցնելու փորձի ժամանակ ոչնչացվել է 58181 «Կենտավր» նախագծի երեք զրահապատ ուկրաինական դեսանտագրոհային մոտորանավ՝ տախտակամածին գտնվող Ուկրաինայի Ռազմածովային ուժերի զինծառայողների հետ միասին։
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։
Ուկրաինայում մարտական գործողությունները շարունակվում են արդեն 75-րդ օրը։