«Հային հայ ա Շուշին միշտ պահալ». Անդրեն նոր տեսահոլովակ է ներկայացրել

Հայտնի երգիչ Անդրեն նոր տեսահոլովակ է ներկայացրել «Իմ Շուշի» երգի հիման վրա:

Երգն արցախյան բարբառով է։ Թե՛ երաժշտության, թե՛ խոսքի հեղինակը Անդրեն է։

«Ա՜խ, Շուշի՛, իմ Շուշի՛, մեր հույսի, հավատքի քաղա՛ք լույսի, դու պը՛նդ կաց, իմ գա՛նձ։ Հային հայ ա Շուշին միշտ պահալ»,- հնչում է երգում։

Մեկ այլ հատվածում հնչում են հետևալ բառերը.

«Դարից դար սկի տյաս չընք մունք քաղալ,

Հայի խելքան ընք մունք միշտ տուժալ,

Մեր Շուշին ըրնի ծով ա տեռալ,

Սիպտակ վանքը գերի ա ընգալ,

Շուշին տալյավ սերտն ա մեր կոտրալ...»։

Տեսահոլովակի ռեժիսորն Արսեն Եսայանն է: Տեսահոլովակը նվիրված է Շուշիի ազատագրման օրվան:

Հիշեցնենք` 1992թ-ի մայիսի 8-ի գիշերը, հայկական ինքնապաշտպանական ուժերը` լեգենդար Արկադի Տեր-Թադևոսյանի՝ Կոմանդոսի հրամանատարությամբ, չորս ուղղություններից մեկնարկած հարձակողական մանևրով սկսեցին «Հարսանիք լեռներում» ռազմական գործողությունը, որը մայիսի 9-ին պսակվեց Շուշիի ամբողջական ազատագրմամբ:

2020թ.-ի սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում սկսեց արցախա-ադրբեջանական սահմանի ողջ երկայնքով, նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն ընդունեցին ռազմական գործողությունների դադարեցման վերաբերյալ։

Այդ հայտարարությամբ Ադրբեջանի վերահսկողության տակ անցավ նաև հայկական հնագույն բերդաքաղաք Շուշին։