Երևանի Հաղթանակ զբոսայգում անցկացվեց «Հայաստանի Անմահ գունդ» հայրենակցական հասարակական կազմակերպության լուռ ակցիան` ի հիշատակ Հայրենական մեծ պատերազմի հերոսների։
Այս տարի Հայաստանում «Անմահ գնդի» ակցիան տեղի ունեցավ ոչ միայն երթի ձևաչափով։ Մասնակիցները կարողացան հարգանքի տուրք մատուցել Հայրենական մեծ պատերազմի հերոսների հիշատակին՝ «Հաղթանակ» զբոսայգում հավերժական կրակի մոտ բարձրացնելով Հայրենական մեծ պատերազմում զոհված իրենց հարազատների լուսանկարը:
Նման ակցիաներ այսօր կանցկացվեն Վանաձորում, Կապանում, Հրազդանում և Հայաստանի այլ քաղաքներում։
Ինչպես նշեց «Հայաստանի Անմահ գունդ» ՀԿ-ի ղեկավար Գոհար Ղումաշյանը` 2016 թվականից իրենք երթ են անցկացնում Երևանում և Հայաստանի այլ քաղաքներում։ 2020 և 2021 թվականներին կորոնավիրուսային վարակի պատճառով երթն անցկացվել է առցանց։
Այս տարի ՀԿ-ի անդամները որոշել են լուռ ակցիա անցկացնել հենց Անմար կրակի կողքին։
Ավելի վաղ ՀՀ բարձրաստիճան ղեկավարությունը ծաղիկներ է խոնարհել Երկրորդ աշխարհամարտի հերոսների հիշատակը հավերժացնող Անմար կրակի մոտ։ Արարողությանը մասնակցել են ՀՀ վարչապետ Նիկոլ Փաշինյանը, նախագահ Վահագն Խաչատուրյանը, ԱԺ նախագահ Ալեն Սիմոնյանը, ԱԺ փոխնախագահ Ռուբեն Ռուբինյանը, ինչպես նաև իշխանության այլ ներկայացուցիչներ։
Արարողությանը մասնակցել են նաև Հայրենական մեծ պատերազմի վետերանները, որոնցից 101-ը բնակվում են Հայաստանում։ Անմար կրակի մոտ հնչել են Հայաստանի և Ռուսաստանի օրհներգերը, ինչպես նաև հանրահայտ «День Победы» երգը։