ԵՐԵՎԱՆ, 9 մայիսի – Sputnik. Հայրենական մեծ պատերազմում տարած հաղթանակի 77-ամյակի առթիվ Դիլիջան քաղաքում տեղի է ունեցել Հայրենական մեծ պատերազմում զոհվածների հիշատակը հավերժացնող հուշահամալիրի վերաբացման արարողությունը: Տեղեկությունը հայտնում է «Զբոսաշրջության և քաղաքաշինության» (TUF) բարեգործական հիմնադրամը։
Հայրենական մեծ պատերազմում զոհվածների հիշատակը հավերժացնող հուշահամալիրի վերաբացման արարողություն
© Photo : пресс-служба TUF
Հուշահամալիրի տարածքում տեղադրված է նաև Արցախյան պատերազմի զոհերի հիշատակը հավերժացնող հուշարձան-աղբյուրը:
Հուշահամալիրի վերականգնման և շրջակայքի բարեկարգման աշխատանքներն իրականացրել է «Զբոսաշրջության և քաղաքաշինության» (TUF) բարեգործական հիմնադրամը՝ անհատ բարերարների, կազմակերպությունների աջակցությամբ և Դիլիջանի համայնքապետարանի ու բնակիչների համատեղ ջանքերով։ Աշխատանքներին աջակցել է նաև Հայաստանում Ռուսաստանի Դաշնության առևտրային ներկայացուցչությունը:
Աշխատանքները մեկնարկել են 2 ամիս առաջ։ Ամբողջությամբ վերականգնվել են համալիրի հուշարձանները, իրականացվել են հարակից տարածքների աղբահանության, կանաչապատման և լուսավորության աշխատանքներ։
«TUF բարեգործական հիմնադրամը և նրա հիմնադիր Ռուբեն Վարդանյանը նախաձեռնեցին հուշահամալիրի վերականգնումը, որպեսզի դիլիջանցիները և քաղաքի հյուրերը կարողանան այս օրը մեր հերոսների հիշատակին իրենց հարգանքի տուրքը մատուցել բարեկարգված հուշահամալիրում: Ժամանակին այս համալիրն ու հարակից տարածքը դիլիջանցիների սիրված վայրերից են եղել, հուսով ենք` բարեկարգումից հետո այն կշարունակի այդպիսին մնալ նրանց համար»,- ասել է հիմնադրամի տնօրեն Մարիետա Մաթևոսյանը:
Դիլիջան համայնքի ղեկավար Դավիթ Սարգսյանն էլ նշել է, որ դիլիջանցիների համար շատ կարևոր է հուշարձանների պահպանումը, քանի որ այնտեղ ունեն և՛ Հայոց ցեղասպանության, և՛ Հայրենական պատերազմի, և՛ Արցախյան պատերազմների զոհերի հիշատակին նվիրված հուշարձաններ։
«Ողջունելի է TUF հիմնադրամի և անհատ բարերարների ցուցաբերած աջակցությունն ու նախաձեռնողականությունը հուշարձանների պահպանման և վերականգման գործում։ Դիլիջանի համայնքապետարանը միշտ պատրաստակամ է համագործակցության համար»,-ընդգծել է Սարգսյանը։
Արարողությունից հետո մասնակիցները ծաղիկներ են խոնարհել անմար կրակի մոտ՝ հարգանքի տուրք մատուցելով Մեծ հայրենականում և Արցախյան պատերազմներում զոհվածների հիշատակին։ Միջոցառման ավարտին հյուրերը նաև ծառեր են տնկել հուշարձանին հարակից նորաստեղծ «Հաղթողների ծառուղում»։