Արցախը որևէ մեկի գրպանում դրված բլիթ չէ, որ վերցնեն ու տան ինչ-որ մեկին․ Թևան Պողոսյան

Այսօր հայության միակ ռեսուրսն ազգային միասնությունն է։ Մայիսի 9-ի ամենագլխավոր խորհուրդներից մեկը, հաղթանակների համար զոհվածներին ու մասնակիցներին հարգանքի տուրք մատուցելուց զատ, միշտ եղել է միասնության խորհրդանիշը։ Այս մասին Sputnik Արմենիայի եթերում ասաց քաղաքական գործիչ Թևան Պողոսյանը։

«Այդ եռատոնը միացնում էր բոլորիս, ու դրա խորհուրդն է, որ այսօր չկա։ Ցավոք, կոտրված սրտով ենք մոտենում այդ օրվան։ Դա նրանից է, որ այսօր ներկայիս իշխանությունները նույնիսկ խոսքով չեն կարողանում ասել, որ մեծ սխալ են արել և դրա համար պետք է գիտակցված հեռանան։ Շունչ չեն տալիս, որ մեր ազգային միասնությունը նորից վերականգնվի»,- ասաց Պողոսյանը։

Անդրադառնալով այս օրերին Հայաստանում ընթացող բողոքի ակցիաներին, Պողոսյանը նշեց՝ այս պահին բողոքում են բոլոր ազգային ուժերը, որոնք բարձրաձայնում են պայքարի կարևորությունը հանուն Արցախի ու Հայաստանի։

Պողոսյանի խոսքով՝ ազգային ուժերը պետք է գալիք սերունդներին այն խորհուրդը փոխանցեն, որ պետք չէ կոտրվել, հանձնվել, թուլանալ կամ ծուլանալ, այլ պետք է գիտակցաբար փայփայել հայրենիքի վերականգնման երազանքը, որ կարողանանք ինչ-որ մի օր հասնել դրան։

Պողոսյանը հուսով է՝ մայիսի 9-ից ու 28-ից բացի, այդ ամսին կլինի նաև այն օրը, երբ հայ ազգը նորից հաղթանակ կունենա։

«Մենք ունենք պարտք մեր պապերին, հայրերին, եղբայրներին ու որդիներին, պետք է հայրենիք վերականգնենք, որովհետև այն, ինչ իրենք արել են, արել են, որ իրենց թոռների, ծոռների ու գալիք սերունդների համար հզոր հայրենիք ապահովեն»,- մեկնաբանեց նա։

Հիշեցնենք` մայիսի 9-ը հայության համար տարիներ շարունակ եռատոն է եղել։ Նախ՝ այն Հայրենական մեծ պատերազմում խորհրդային ժողովուրդների տարած հաղթանակի օրն է։ Երկրորդ՝ 1992թ-ի մայիսի 8-ի գիշերը հայկական ինքնապաշտպանական ուժերը` լեգենդար Արկադի Տեր-Թադևոսյանի՝ Կոմանդոսի հրամանատարությամբ, չորս ուղղություններից մեկնարկած հարձակողական մանևրով սկսեցին «Հարսանիք լեռներում» ռազմական գործողությունը, որը մայիսի 9-ին պսակվեց Շուշիի ամբողջական ազատագրմամբ: Եվ երրորդ՝ այն Արցախի պաշտպանության բանակի ստեղծման օրն է։