ԵՐԵՎԱՆ, 6 մայիսի - Sputnik. ՌԴ օդատիեզերական ուժերը Կրամատորսկում Ուկրաինայի զինամթերքի խոշոր պահեստ են ոչնչացրել։ Տեղեկությունը հայտնել է Ռուսաստանի պաշտպանության նախարարության պաշտոնական ներկայացուցիչ, գեներալ-մայոր Իգոր Կոնաշենկովը:
«Ռուսաստանի օդատիեզերական ուժերի օդային բազավորման բարձր ճշգրտության հրթիռներով ոչնչացվել է ուկրաինական զորքերի խմբավորման զինամթերքի խոշոր պահեստը, որը տեղակայված էր Կրամատորսկ քաղաքի «Էներգոմաշսպեցստալ» գործարանի տարածքում», - ասել է գեներալը:
Նրա խոսքով՝ ռուսական հրթիռային զորքերը ոչնչացրել են ուկրաինական C-300 համալիրի արձակման կայանքը, ինչպես նաև խոցել են ուկրաինացի զինվորականների կենդանի ուժի ու տեխնիկայի կենտրոնացման 5 շրջան:
Գեներալը նաև հայտնել է, որ Զապորոժիեի մարզի Նովոտավրիկոյե բնակավայրի շրջանում ոչնչացվել է ուկրաինական զորքերի «Տոչկա-Ու» մարտավարական հրթիռային համալիրը:
Բացի այդ, ռուսական ՀՕՊ միջոցները Լուգանսկի օդային տարածքում խոցել են ուկրաինական Սու-25 և ՄիԳ-29 ինքնաթիռները, ինչպես նաև որսացել են «Տոչկա-Ու» 4 բալիստիկ հրթիռներ:
ՌԴ պաշտպանության նախարարության տվյալներով՝ Խարկովի ու Խերսոնի մարզերում, ԴԺՀ-ում ու ԼԺՀ-ում ոչնչացվել են 13 ուկրաինական ԱԹՍ:
ՌԴ հրետանային ստորաբաժանումները ոչնչացրել են ուկրաինական զորքերի կառավարման 6 կետ, զինամթերքի 3 պահեստ, ուկրաինական 26 հրետանային մարտկոց և ԶՈւ-ի 187 հենակետեր ու կուտակումներ:
Կոնաշենկովն ընդգծել է, որ հարվածների հետևանքով «ոչնչացվել են մինչև 280 ազգայնականներ և ԶՈւ-ի ռազմական տեխնիկայի 41 միավոր»:
Ռուսական ինքնաթիռները, ուղղաթիռներն ու անօդաչու թռչող սարքերն անցած գիշեր հարվածներ են հասցրել ուկրաինական 24 ռազմական օբյեկտների, ոչնչացրել զինամթերքի 2 պահեստ ու հրետանային մարտկոց կրակային դիրքերում:
ՌԴ ԶՈւ-ն Ուկրաինայում հատուկ գործողության սկզբից ոչնչացրել է 151 ինքնաթիռ, 112 ուղղաթիռ, 742 անօդաչու թռչող սարք, 290 զենիթային հրթիռային համալիր, 2854 տանկ և այլ մարտական զրահապատ մեքենաներ, համազարկային կրակի ռեակտիվ համակարգերի 329 սարք, 1338 դաշտային հրետանի ու ականանետ, ինչպես նաև 2683 միավոր հատուկ ռազմական ավտոմոբիլային տեխնիկա:
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։
Ուկրաինայում մարտական գործողությունները շարունակվում են արդեն 72-րդ օրը։