ԵՐԵՎԱՆ, 30 ապրիլի – Sputnik. Ռուսական ՀՕՊ համալիրները մեկ գիշերվա ընթացքում ուկրաինական մոտ 2 տասնյակ ԱԹՍ են խոցել։ Այս հայտարարությունն արել է ՌԴ պաշտպանության նախարարության պաշտոնական ներկայացուցիչ, գեներալ-մայոր Իգոր Կոնաշենկովը:
«Ռուսական հակաօդային պաշտպանության միջոցներով Գորլովկա, Չեռվոնի Օսկոլ, Պետմանովո, Կրամատորսկ, Կոզինա, Կարպովկա, Պուտիլինա, Նովոախտիրկա, Բեզլիկի Լիման և Պերեմոգա բնակավայրերի երկնքում ոչնչացվել է 18 ուկրաինական անօդաչու թռչող սարք, այդ թվում՝ երեք «Բայրաքթար ՏԲ-2»»,- ասել է նա։
Բացի այդ, գիշերվա ընթացքում խոցվել է ուկրաինական «Սմերչի» 2 ռեակտիվ հրթիռ։
«Օդային բազավորման բարձր ճշգրտության հրթիռներով գիշերվա ընթացքում խոցվել է ուկրաինական 5 ռազմական օբյեկտ, այդ թվում՝ զինամթերքի և վառելիքի 4 պահեստ, ինչպես նաև ազգայնականների կենդանի ուժի և տեխնիկայի կենտրոնացման շրջան»,-ասել է գեներալը։
Բացի այդ, նրա խոսքով, ՌԴ հրթիռային զորքերը խոցել են կառավարման 2 կետ, համազարկային կրակի ռեակտիվ համակարգերի մարտկոց և ռադիոլոկացիոն կայան:
«Հրետանային ստորաբաժանումների կողմից գիշերվա ընթացքում խոցվել է հակառակորդի 389 օբյեկտ։ Դրանց թվում են 35 կառավարման կետ, 41 հենակետ, կենդանի ուժի և ռազմական տեխնիկայի կենտրոնացման 169 շրջան, հրետանու 33 դիրքեր, ինչպես նաև հրթիռահրետանային սպառազինության և զինամթերքի 15 պահեստ»,- ընդգծել է Կոնաշենկովը:
Ռուսական ավիացիան մեկ գիշերվա ընթացքում ոչնչացրել է ավելի քան 120 ազգայնական, 4 տանկ և 6 միավոր զրահատեխնիկա։
Ռազմական հատուկ գործողության մեկնարկից ի վեր ոչնչացվել է 142 ինքնաթիռ, 112 ուղղաթիռ, 658 ԱԹՍ, 279 զենիթահրթիռային համալիր, 2656 տանկ և այլ մարտական զրահապատ մեքենաներ, համազարկային կրակի ռեակտիվ համակարգերի 307 կայանք, դաշտային հրետանու 1189 հրանոթ և ականանետ, ինչպես նաև 2492 միավոր հատուկ ռազմական ավտոմոբիլային տեխնիկա:
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները վճռական և անհապաղ գործողություններ են պահանջում։
Ուկրաինայում մարտական գործողությունները շարունակվում են արդեն 66-րդ օրը։