Երևանյան համերգը հարգանքի տուրք կլինի ռուսական մշակույթին. թավջութակահար Նարեկ Հախնազարյան

ԵՐԵՎԱՆ, 30 ապրիլի – Sputnik. Մայիսի 1-ին Արամ Խաչատրյան համերգասրահում առաջին անգամ տեղի կունենա թավջութակահար Նարեկ Հախնազարյանի և հայկական արմատներով ֆրանսիացի դաշնակահար Ժան-Պոլ Գասպարյանի համատեղ կամերային համերգը:

Ծրագրի առաջին մասում կհնչեն Ժյուլ Մասնեի և Սեզար Ֆրանկի, երկրորդ մասում՝ Պյոտր Չայկովսկու և Դմիտրի Շոստակովիչի ստեղծագործությունները։

Հայաստանի վաստակավոր արտիստ, թավջութակահար Նարեկ Հախնազարյանի խոսքով՝ մշակույթը սահմաններ չպետք է ունենա։ Արևմուտքի երկրներում ռուս կոմպոզիտորների ստեղծագործությունների կատարման արգելքը երաժիշտը մշակութային նացիզմ է համարում։

«Չայկովսկին ռուս կոմպոզիտոր է, բայց նրա ստեղծագործությունները միայն Ռուսաստանինը չեն։ Դրանք համաշխարհային արժեք են․.. Իրականում մշակույթը պետք է հնարավորինս հեռու լինի քաղաքականությունից։ Մեր ծրագիրը հարգանքի տուրք է այն հանճարեղ կոմպոզիտորներին, որոնց ստեղծագործությունները մենք կատարելու ենք»,- ասաց Հախնազարյանը Sputnik Արմենիա միջազգային մուլտիմեդիոն մամուլի կենտրոնում կայացած ասուլիսում։

Նա նշեց, որ այս համերգով ցանկանում է հարգանքի տուրք մատուցել ռուսական մշակույթին, որը, իր իսկ խոստովանությամբ, շատ է սիրում։

Ժան-Պոլ Գասպարյանն իր հերթին ընդգծեց, որ բացարձակ աբսուրդ է, երբ երաժիշտներին արգելում են կատարել ռուս կոմպոզիտորների ստեղծագործությունները։

«Ես ուրախությամբ համաձայնեցի մասնակցել այս համերգին նաև այն պատճառով, որ ֆրանս-ռուսական ծրագիր է»,- ասաց նա։

Հախնազարյանը լրագրողներին ցուցադրեց իր նոր գործիքը․ թավջութակը 5 ամիս առաջ պատրաստել է հայկական արմատներով բեռլինցի վարպետ Գաբրիել Ջեբրան Յակուբը։ Գործիքն անուն ունի` «Կոմիտաս», իսկ «ականջներից» մեկի վրա Հայաստանի զինանշանն է պատկերված։

Ժան Պոլ Գասպարյանը (մորական կողմից սերբ է, հորական կողմից՝ հայ) ծնվել և մեծացել է Փարիզում, բայց իրեն շատ լավ է զգում Հայաստանում։ Վերջին կես տարում արդեն երրորդ անգամ է այստեղ գալիս։

Դաշնակահարը խոստովանում է, որ հորական կողմի ազգականներն իրեն համոզել են հայերեն սովորել։ Հուսով է` հետագայում կկարողանա հենց հայերենով հարցազրույց տալ։