Երևանի թատրոնի և կինոյի պետական ինստիտուտի խորեոգրաֆիայի ամբիոնի դասախոսական կազմն ու ուսանողները Պարի միջազգային օրվա կապակցությամբ յուրահատուկ ֆլեշմոբ են կազմակերպել։ Նրանք պարել են Երևանի բակերում։
Երիտասարդները ելույթ են ունեցել խորեոգրաֆիայի ամբիոնի վարիչ Լիանա Հակոբյանի ղեկավարությամբ։
1982-ից ի վեր ապրիլի 29-ին նշվում է Պարի միջազգային օրը, որը ֆրանսիացի հայտնի բալետմայստեր Ժան Ժորժ Նովերի ծննդյան օրն է: Նա հայտնի է որպես բարեփոխիչ և խորեոգրաֆիկ արվեստի տեսաբան, որը պատմության մեջ է մտել որպես «ժամանակակից բալետի հայր»:
Ամեն տարի ապրիլի 29-ին օպերայի և բալետի թատրոնները, ժամանակակից պարային խմբերը և այս ոլորտի այլ պրոֆեսիոնալներ նշում են իրենց մասնագիտական տոնը: