ԵՐԵՎԱՆ, 28 ապրիլի – Sputnik. Գիշերվա ընթացքում օդից բարձր ճշգրտության հրթիռներով հարվածներ են հասցվել Ուկրաինայի 4 ռազմական օբյեկտների, ոչնչացվել է հրթիռահրետանային սպառազինության և ռազմամթերքի երկու պահեստ։ Այս մասին հայտնել է ՌԴ ՊՆ պաշտոնական ներկայացուցիչ, գեներալ-մայոր Իգոր Կոնաշենկովը։
Ինչպես նշել է գեներալը, ռուսական հրթիռային զորքերն ու հրետանին անցած օրվա ընթացքում խոցել են ուկրաինական զորքերի կառավարման 18 կետ և այլ օբյեկտներ։
«Հրթիռային զորքերն ու հրետանին գիշերվա ընթացքում 408 կրակային առաջադրանք են կատարել։ Կառավարման 18 կետ և կենդանի ուժի ու ռազմատեխնիկայի կենտրոնացման 383 վայր է խոցվել»,- ասել է նա։
Ռուսական ՀՕՊ համալիրներն էլ անցած գիշերվա ընթացքում ուկրաինական մեկ Սու-24 ռմբակոծիչ և 5 անօդաչու են խոցել։
«Հակաօդային պաշտպանության ռուսական միջոցներով Լուգանսկի Ժողովրդական Հանրապետության Նիկոլաևկա բնակավայրի վրա Ուկրաինայի ԶՈւ-ի Սու-24 ինքնաթիռ է խոցվել։ Վեսելոգորովկա, Զատիշնոյե, Նովոմիխայլովկա, Լյուբիմովկա, Խարկով բնակավայրերի շրջանում ուկրաինական 5 անօդաչու թռչող սարք է ոչնչացվել»,- նշել է գեներալը։
Կոնաշենկովը հայտնել է նաև, որ ռուսական ՀՕՊ-ը հետ է մղել Խարկովի մարզի Իզիում քաղաքի հիվանդանոցի ուղղությամբ «Տոչկա-Ու» հրթիռի արձակած հարվածը։
ՌԴ ՕՏՈւ-ի օպերատիվ-մարտավարական և բանակային ավիացիան մեկ օրվա ընթացքում խոցել է ուկրաինական 67 ռազմական օբյեկտ և հակառակորդի կենդանի ուժի կենտրոնացման 55 վայր` ոչնչացնելով անձնակազմի ավելի քան 300 անդամի, մինչև 40 միավոր տեխնիկա, 6 կառավարման կետ։
Կոնաշենկովի խոսքով` հատուկ գործողությունների մեկնարկից ի վեր Ուկրաինայի համազարկային կրակի ռեակտիվ համակարգերի շուրջ 300 կայանք է ոչնչացվել։
ՌԴ ՊՆ տվյալների համաձայն` հատուկ գործողությունների սկզբից ոչնչացվել են ընդհանուր առմամբ 142 ինքնաթիռ, 111 ուղղաթիռ, 614 անօդաչու, 276 ԶՀՀ, 2623 տանկ և այլ մարտական զրահամեքենա, համազարկային կրակի ռեակտիվ համակարգերի 299 կայանք, դաշտային հրետանու 1146 սարք և ականանետ, ինչպես նաև 2431 միավոր հատուկ ռազմական ավտոմոբիլային տեխնիկա։
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։
Ուկրաինայում մարտական գործողությունները շարունակվում են արդեն 64-րդ օրը։