«Երիտասարդի ձայն» նախաձեռնությունը վաղ առավոտից Երևանի կենտրոնում իրազեկման ակցիաներ է իրականացնում` պայմանավորված երկրի ներկայիս իրավիճակով, Արցախի խնդրով ու իշխանությունների անգործությամբ։
Երևանի Թատրոնի և կինոյի պետական ինստիտուտի մի խումբ ուսանողներ իրենց ակցիան սկսեցին Արա Գևորգյանի «Արցախ» երգով։
Այնուհետև՝ հայկական եռագույնը ձեռքներին, սկսեցին «Քոչարի» պարել, իսկ այժմ երթով անցնում են մայրաքաղաքի կենտրոնով` վանկարկելով «Պայքա՛ր»։
Հիշեցնենք` ՀՀ ԱԺ փոխխոսնակ, «Հայաստան» խմբակցության անդամ Իշխան Սաղաթելյանը ապրիլի 22-ին հայտարարեց Փաշինյանին և նրա թիմին իշխանությունից հեռացնելու փողոցային պայքարի մեկնարկի մասին։
Արդեն երրորդ օրն է՝ ընդդիմությունն ակցիաներ է անում Երևանում։ Ապրիլի 26-ին հատկապես ակտիվ էին երիտասարդները։ Նրանց ակցիան ապրիլի 26-ին մեկնարկեց Հայաստանի պետական տնտեսագիտական համալսարանի գլխավոր մասնաշենքի մոտ, որտեղ Արցախի դրոշ տեղադրեցին, այնուհետև Արցախի մեծ դրոշը պարզած՝ շարժվեցին դեպի Երևանի պետական համալսարան, հետո հասան ՀՀ կառավարության շենքի մոտ և որոշեցին նվեր հանձնել ՀՀ վարչապետ Նիկոլ Փաշինյանին, սակայն ոստիկանները սկսեցին ուժ գործադրել ու հեռացնել նրանց այդտեղից։ Ավելի ուշ հայտնի դարձավ, որ 10 հոգու տեղափոխել են ոստիկանություն։
ՀՅԴ երիտասարդական թևի ներկայացուցիչները փողոցներ փակեցին, իսկ 44-օրյա պատերազմում զոհված զինվորականների ծնողներն ու հարազատները երթի դուրս եկան։