ԵՐԵՎԱՆ, 26 ապրիլի – Sputnik. Միջուկային պատերազմի ռիսկերն այժմ շատ զգալի են, այդ վտանգը պետք չէ թերագնահատել, հայտարարել է ՌԴ արտգործնախարար Սերգեյ Լավրովը ռուսական Առաջին ալիքի «Մեծ խաղ» հաղորդման ժամանակ։
Ռուս նախարարը հիշեցրել է, որ «միջուկային հնգյակի» երկրները հունվարին վերահաստատել են միջուկային պատերազմի անթույլատրելիության մասին թեզը։
«Սա մեր սկզբունքային դիրքորոշումն է,- ասել է նա,- երբ ռիսկերն իսկապես շատ ու շատ զգալի են, ես իսկապես չէի ցանկանա, որ այդ ռիսկերն արհեստականորեն ուռճացվեին, իսկ նման ցանկություն ունեցողները շատ են։ Վտանգը լուրջ է, այն իրական է, այն չի կարելի թերագնահատել»։
Լավրովը նաև հույս է հայտնել, որ արեւմտյան երկրները թույլ չեն տա իրենց զորքերն ուղարկել Ուկրաինա։
«Մենք ոչ մի դեպքում չպետք է թույլ տանք, որ երրորդ համաշխարհային պատերազմ սկսվի։ Հենց այս համատեքստում են նրանք դիտարկում Զելենսկու և նրա թիմի մշտական սադրանքները, ովքեր պահանջում են մինչև անգամ ՆԱՏՕ-ի զորքեր մտցնել՝ Ուկրաինայի իշխանություններին պաշտպանելու համար։ Եվ բոլորը մշտապես ասում են, որ զենք կտան, ինչը, իհարկե, նույնպես կրակի վրա յուղ լցնել է։ Նրանք ցանկանում են օգտագործել զենքի մատակարարումները՝ ստիպելու ուկրաինացիներին կռվել Ռուսաստանի դեմ մինչև վերջին զինվորը, եթե միայն այս հակամարտությունը երկարաձգվի»,- ասել է Լավրովը։
Լավրովն զգուշացրել է, որ Կիևին մատակարարվող արևմտյան զենքերը (ներառյալ Javelin համակարգերը) կարող են հայտնվել ահաբեկիչների ձեռքում և այդպիսով վերադառնալ արևմտյան երկրներ։
Միաժամանակ, ՌԴ ԱԳ նախարարը նշել է, որ ՆԱՏՕ-ի երկրների ղեկավարները՝ բացի Լեհաստանից, բացառում են դաշինքի ներգրավումը Ռուսաստանի հետ ուղիղ բախման մեջ։