ԵՐԵՎԱՆ, 25 ապրիլի – Sputnik. Երևանի պետական բժշկական համալսարանի ուսանողներն Արցախի դրոշ բարձրացրին Երևանի բժշկական համալսարանի բակում։
«Մենք Արցախի հետ ենք»,- դրոշը տեղադրելուց հետո վանկարկեցին նրանք։
ԵՊԲՀ ուսանող Նաիրի Մելոյանը, որը դրոշը բարձրացնողներից էր, ասաց, որ իրենց համալսարանը բազմաթիվ զոհեր է ունեցել 44-օրյա պատերազմում և այս պահին էլ Արցախում ծառայող բազմաթիվ շրջանավարտներ ունի։
«Սա քաղաքական և կուսակցական ակցիա չէ։ Պարզապես ուզում ենք ցույց տալ, որ մենք ևս կողմ ենք Արցախի պաշտպանությանը»,- նշեց Նաիրին։
ԵՊԲՀ ուսանող Խորեն Ամիրխանյանն էլ շեշտեց, որ նման քայլերով պետք է Արցախի հայրենակիցներին ցույց տալ, որ հատկապես երիտասարդությունն իրենց կողքին է։
«Ոչ մի իշխող խումբ չի կարողանալու Արցախի ճակատագիրը որոշել առանց հայ ժողովրդի համաձայնության։ Մենք Արցախի գինը շատ լավ գիտենք։ Ամեն մի միլիմետրի վրա թափված արյունը սրբացրել է այդ հողը»,- ասաց Խորենը։
Նա հավելեց, որ եթե պետք լինի, պատրաստ են ոտքի կանգնել Արցախի համար։
Հիշեցնենք, որ ընդդիմադիրներն ապրիլի 12-ին բոյկոտեցին ԱԺ նիստը և դուրս եկան խորհրդարանի նիստերի դահլիճից։ Մինչ այդ նրանք Արցախի դրոշն էին տեղադրել ԱԺ դահլիճում։ Դրանից հետո ընդդիմությունն արշավ սկսեց` Արցախի դրոշը տեղադրելով ՀՀ տարբեր մարզերում և քաղաքներում։