ԵՐԵՎԱՆ, 25 ապրիլի – Sputnik. Հայաստանի ամերիկյան համալսարանում տեղի է ունեցել «ԴԻՋԻԿՈԴ» կիրառական ծրագրավորման 7-րդ հանրապետական մրցույթի եզրափակիչ փուլը, որը կազմակերպել էր Առաջատար տեխնոլոգիաների ձեռնարկությունների միությունը: Տեղեկությունը հայտնում է ԿԳՄՍՆ մամուլի ծառայությունը։
Հանրակրթության և արտադպրոցական կրթության քաղաքականության մշակման և վերլուծության բաժնի պետ Անուշ Լալազարյանը մրցույթի 9 հաղթողներին ԿԳՄՍ նախարարության շնորհակալագրեր է հանձնել՝ կազմակերպիչներին շնորհակալություն հայտնելով այդպիսի տպավորիչ և հեռանկարային միջոցառման համար:
«ԴԻՋԻԿՈԴ» կիրառական ծրագրավորման 7-րդ հանրապետական մրցույթի եզրափակիչ փուլը (25 ապրիլի, 2022թ). Երևան
© Photo : official site of MESCS of RA
ԱՏՁՄ գործադիր տնօրեն Հայկ Չոբանյանը նշել է, որ «Արմաթում» սովորող 18 000 երեխաներ իրենց տաղանդի, մոտիվացիայի և նվիրվածության շնորհիվ հրաշքներ են գործում՝ գերազանցելով բոլոր սպասելիքները։
«Մոտ 10-12 տարի առաջ մենք ունեինք երազանք, որն այսօր արդեն իրականություն է։ Այսօր արդեն արմաթցիները մեր տեխնոլոգիական համայնքի լիիրավ անդամներն են, և ես ուրախ եմ, որ մենք միասին կարողացանք սա իրականություն դարձնել»,–ասել է նա:
«ԴԻՋԻԿՈԴ» կիրառական ծրագրավորման 7-րդ հանրապետական մրցույթի եզրափակիչ փուլը (25 ապրիլի, 2022թ). Երևան
© Photo : official site of MESCS of RA
Նշենք, որ այս տարի մրցույթն իրականացվել է նաև մարզային փուլերով՝ Երևանում, Գյումրիում, Վանաձորում, Իջևանում և Գորիսում: Մրցույթին մասնակցության հայտ է ներկայացրել 942 թիմ՝ ավելի քան 1000 աշակերտ՝ ՀՀ բոլոր մարզերից, Արցախից, Ջավախքից, Հնդկաստանից և ԱՄՆ-ից: Եզրափակիչ փուլում աշխատանքներ է ներկայացրել 60 թիմ՝ 72 աշակերտ:
Մրցույթն անցկացվել է հետևյալ անվանակարգերում՝ «Վիրտուալ լաբորատորիա STEM առարկաների թեմաներով», «Համակարգչային խաղեր», «Լավագույն ալգորիթմական լուծում օլիմպիադայի ձևաչափով», «Սարքերի ինտեգրում՝ նոր տեխնիկական լուծում»:
Մրցույթի հիմնական նպատակն է խրախուսել և զարգացնել դպրոցականների ալգորիթմական մտածողությունը, աշակերտներին խաղ սպառողից վերածել խաղ ստեղծողի, բացահայտել ակտիվություն ցուցաբերած դպրոցներին և տաղանդավոր պատանիներին՝ նրանց հնարավորություն տալով զարգացնել իրենց ստեղծագործական ունակությունները: