Ոչ թե միջազգային հանրության, այլ մեր բանակի վրա պետք է ջանք թափենք. Շիրակի թեմի առաջնորդ

Շիրակի թեմի առաջնորդ տեր Միքայել արքեպիսկոպոս Աջապահյանը կարծում է, որ Հայոց ցեղասպանության հարցում միջազգային հանրության կամ այլ պետությունների վրա ջանք թափելու փոխարեն, պետք է սեփական երկրի, բանակի վրա ջանք գործադրել։ Նա Գյումրու Բագրատունյաց պուրակի Հայոց ցեղասպանության զոհերի հիշատակին նվիրված հուշարձանին այսօր ծաղիկներ է խոնարհել։

Նրա խոսքով` հենց սա է ապրիլյան նահատակների կտակը ու պատգամը մեզ, որ ոչ թե թողնենք ու հեռանանք երկրից, որ հարուստ լինենք կամ էլ օտար պետությունների դռները ծեծենք, որպեսզի Հայոց ցեղասպանությունը ճանաչեն, այլ որ սեփական երկիրն ուժեղացնենք։ Տեր Միքայել արքեպիսկոպոս Աջապահյանն ասում է` եթե որևէ պետություն 100 տարի չի ճանաչել ցեղասպանությունը, չեն էլ ճանաչելու, ուստի պետք է մեր հարցերը մեր խելքով ու մեր ձեռքերով լուծենք։

Հարցին, թե մենք կարո՞ղ ուժ ենք` վերջինս նշեց, թե հարյուր տարին բավարա՞ր չէր կարող դառնալու համար. «Քանի՞ դար է պետք՝ ուժեղանալու, ազգ ու պետություն դառնալու համար. հազարամյա՞կ է պետք»։

Հիշեցնենք` 1915 թվականին տեղի ունեցած ոճրագործությունը, որի հետևանքով Օսմանյան կայսրությունում ավելի քան 1.5 մլն հայ է սպանվել, ХХ դարի առաջին ցեղասպանությունն է համարվում։ Թուրքիան ավանդաբար մերժում է ցեղասպանություն իրագործելու մեղադրանքներն ու անչափ ցավագին ընդունում այդ հարցի վերաբերյալ քննադատությունը։

Հայոց ցեղասպանությունն առաջինը պետական մակարդակով ճանաչել է Ուրուգվայը՝ 1965 թվականին, այնուհետև նրա օրինակին են հետևել ևս 27 երկրներ` Արգենտինան, Ավստրիան, Բելգիան, Բոլիվիան, Բրազիլիան, Կանադան, Չիլին, Կիպրոսը, Չեխիան, Դանիան, Գերմանիան, Հունաստանը, Լատվիան, Լիտվան, Լյուքսեմբուրգը, Նիդեռլանդները, Պարագվայը, Լեհաստանը, Պորտուգալիան, Ռումինիան, Ռուսաստանը, Սիրիան, Սլովակիան, Շվեդիան, Շվեյցարիան, Ֆրանսիան, ԱՄՆ-ն։

Հայոց ցեղասպանությունը ճանաչելու մասին նաև հռչակագրեր և բանաձևեր են ընդունել մի շարք միջազգային կազմակերպություններ և միջազգային կառույցներ, այդ թվում՝ Եվրոպայի խորհուրդը և Եվրոպական խորհրդարանը, ինչպես նաև տարբեր երկրների վարչատարածքային միավորներ՝ նահանգներ և քաղաքներ։