ԵՐԵՎԱՆ, 22 ապրիլի – Sputnik. Ռուսաստանը փաստեց, որ ԼՂ առնչությամբ «որևէ տեղ չի գնալու», և հարցի կարգավորումը անմիջապես իր ջանքերի հետ է կապում: Sputnik Արմենիա մուլտիմեդիոն մամուլի կենտրոնում կայացած ասուլիսի ժամանակ նման կարծիք հայտնեց քաղտեխնոլոգ Վիգեն Հակոբյանը, անդրադառնալով ապրիլի 19-ին ՀՀ վարչապետ Նիկոլ Փաշինյանի Մոսկվա կատարած այցին և դրա արդյունքում երկու երկրների ղեկավարների հայտարարությանը:
Վիգեն Հակոբյան
© Sputnik / Aram Nersesyan
«Ռուսաստանը հայտարարեց, որ ԼՂ-ում են գտնվում ռուս խաղաղապահները, որոնք ապահովում են անվտանգությունն ու կայունությունը: Սա այն կետն է, որը հաստատում է Ռուսաստանի շարունակական գործողությունները ԼՂ հարցի շուրջ: Հայաստանի համար բավական դրական է սա, և նշանակում է, որ Ռուսաստանը որևէ շտապողականություն չի ցուցաբերում վերջնական կարգավիճակի սահմանման առումով»,-ասաց Հակոբյանը:
Նրա խոսքով՝ ՌԴ-ն որևէ առիթ չի տեսնում, որ պատերազմից հետո ձևավորված նոր ստատուս քվոն վերանայվի: Ավելին, ըստ Հակոբյանի, որևէ ակնարկ չկա, որ ՌԴ-ն՝ որպես միջազգային հանրության անդամ, պահանջում է, որ նշաձողի հստակեցում լինի:
Քաղտեխնոլոգը նշում է՝ ՀՀ իշխանություններն են այս դեպքում բարդ իրավիճակում հայտնվում, քանի որ ստացվում է՝ Նիկոլ Փաշինյանը հայտնվել է երկու գեոքաղաքական ուժային քարերի արանքում: Նա նշեց նաև, որ երկու կողմերին էլ իշխանությունը որոշակի խոստումներ է տվել, և երկու կողմերն էլ (Արևմուտք և ՌԴ,–խմբ.) փորձում են իրենց տակ քաշել խնդրի կարգավորման գործընթացը: Ըստ Հակոբյանի՝ մեր իշխանությունը կփորձի մանևրել, սակայն այն հայտարարությունը, որն արվեց Փաշինյան-Պուտին հանդիպումից հետո, փաստում է, որ Փաշինյանին շատ մանևրելու հնարավորություն չեն թողել:
Անդրադառնալով հայ-թուրքական հարաբերություններին՝ Հակոբյանը նշեց, որ Թուրքիայի հետ հարաբերությունների գործընթացն աշխարհաքաղաքական բոլոր խաղացողների համար լուրջ գործընթաց է, քանի որ Թուրքիան այսօրվա պայմաններում գերազդեցիկ խաղացող է: Այսինքն՝ Հայաստանի դերակատարումը դիտարկելիս յուրաքանչյուրն իր շահերն ունի:
Հիշեցնենք` ապրիլի 13–ին ԱԺ–ում ՀՀ վարչապետ Նիկոլ Փաշինյանը հայտնել էր 44–օրյա պատերազմում զոհվածների թիվն ու ասել, որ ընդունել է իր մեղքն ու պատասխանատվությունը պատերազմի ու պարտության համար։ Բայց չի ընդունում ընդդիմության` իրեն հասցեագրած մեղադրանքները` 2020թ–ի նոյեմբերի 9-ից հետո հողերը հանձնելու ու դավաճանության մեջ։
Նա ասել էր, որ իրեն պետք է մեղադրել ոչ թե հողեր հանձնելու, այլ չհանձնելու մեջ։ Նա ասել էր` հնարավոր է` մեղավոր է դրանում, որովհետև 2018-19թթ–ին մեր հանրության առաջ չի կանգնել ու չի հայտարարել, որ մեր բոլոր հեռու ու մոտ բարեկամները մեզանից ակնկալում են, որ մենք այս կամ այն կոնֆիգուրացիայով Ադրբեջանին հանձնենք 7 հայտնի շրջանները և իջեցնենք Արցախի կարգավիճակի համար մեր սահմանած նշաձողը։