ԵՐԵՎԱՆ, 22 ապրիլի – Sputnik. ԱՄՆ Պետդեպարտամենտի խոսնակի՝ իբր նացիստների կողմից Մարիուպոլի նկատմամբ վերահսկողությունը պահպանելու մասին ստելու ջանքերը ուղղակի աջակցություն են ահաբեկիչներին պետական բարձր մակարդակով։ Այս մասին հայտարարել է ՌԴ ՊՆ պաշտոնական ներկայացուցիչ, գեներալ-մայոր Իգոր Կոնաշենկովը։
«Մարիուպոլում իրավիճակը կարգավորվել է ։ Քաղաքի բնակիչները հնարավորություն են ստացել ազատ տեղաշարժվել փողոցներում, առանց ուկրաինացի նացիստների գնդակոծություններից թաքնվելու։ Մարդասիրական օգնություն է մատակարարվում՝ սննդամթերք, ջուր և առաջին անհրաժեշտության պարագաներ: Դոնեցկի Ժողովրդական Հանրապետության իշխանությունները կազմակերպում են փողոցների մաքրումը փլատակներից և ուկրաինական ռազմական տեխնիկայի դուրսբերումը», - ասել է Կոնաշենկովը։
Նրա խոսքով՝ «Ազով» գնդի ուկրաինացի նացիստների մնացորդները (որի մարտիկների դեմ ՌԴ-ում քրեական գործ է հարուցվել) ԱՄՆ-ից և եվրոպական երկրներից օտարերկրյա վարձկանների հետ միասին հուսալիորեն արգելափակվել են «Ազովստալ» կոմբինատի տարածքում:
«Մեր պահանջները` ազատ արձակել նրանց հետ իբր գտնվող կանանց և երեխաներին ցանկացած ուղղությամբ ազատ դուրս գալու համար, նացիստներն անտեսում են», - նշել է գեներալը:
Նրա խոսքով` ««Ազովի» նացիստների և օտարերկրյա վարձկանների կողմից քաղաքացիական անձանց պատանդ պահելը, եթե այդպիսիք կան այնտեղ, ապացուցում է, որ նրանք ոչ թե «պաշտպաններ» են, այլ «վերջացած ահաբեկիչներ»:
«ԱՄՆ Պետդեպարտամենտի խոսնակի՝ իբր նացիստների կողմից Մարիուպոլի նկատմամբ վերահսկողությունը պահպանելու մասին ստելու ջանքերը ֆեյք են և պետական բարձր մակարդակով ուղղակի աջակցություն ահաբեկիչներին։ Պետդեպը սովորականի պես ապատեղեկատվություն է տալիս սեփական քաղաքացիներին, ինչպես և բոլոր մյուսներին»,–ընդգծել է Կոնաշենկովը։
Գեներալը հայտնել է նաև, որ Ռուսաստանի ՌԾՈւ–ն խոցել է 26 ուկրաինական ռազմական օբյեկտ, ոչնչացվել է հրթիռահրետանային սպառազինության երեք պահեստ:
Գործողության ողջ ընթացքում Ռուսաստանի Զինված ուժերը ոչնչացրել են 140 ուկրաինական ինքնաթիռ և 523 անօդաչու թռչող սարք:
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։ Հատուկ գործողության նպատակը Ուկրաինայի ապառազմականացումն է ու ապազգայնականացումը, ինչպես նաև նրան չեզոքության մղելը։
Ուկրաինայում մարտական գործողություններն ընթանում են արդեն 58-րդ օրը։