ԵՐԵՎԱՆ, 21 ապրիլի – Sputnik. Բելառուսական ընկերությունները հայաստանյան այցի ընթացքում արդեն շուրջ 20 մլն դոլարի պայմանագրեր են կնքել հայ գործընկերների հետ: Այդ մասին հայտնեց Եվրասիական տնտեսական հանձնաժողովի արդյունաբերական քաղաքականության վարչության տնօրեն Նիկոլայ Կուշնարյովը՝ ամփոփելով բելառուսական գործարարների պատվիրակության այցի արդյունքները:
Կուշնարյովի խոսքով` դրանք միայն ֆիքսված պայմանագրերն են՝ չհաշված համագործակցությունը շարունակելու շրջանակային համաձայնագրերը: Հիմա հայկական կողմի հետ քննարկում են առաջիկա անելիքները, քանի որ արևմտյան երկրների պատժամիջոցային քաղաքականության պայմաններում Ռուսաստանի ու Բելառուսի ընկերություններն ուզում են վերականգնել դեռ խորհրդային տարիներին գործող կոոպերացիոն կապերը։
«Պատժամիջոցների ներկայիս ճնշման պայմաններում միկրոէլեկտրոնիկայի ոլորտը կարևոր է դառնում ԵԱՏՄ–ի համար։ Ավելացված արժեքի շղթայում ներառվելու, բաղադրիչների, պահեստամասերի, հնարավոր է՝ ինչ-որ տեխնոլոգիաների մատակարար դառնալու հնարավորություններ են ի հայտ գալիս, այդ թվում` հայաստանյան ընկերությունների համար»,- նշեց Կուշնարյովը։
Այդ պատճառով, ըստ նրա, բելառուսական ընկերությունները Հայաստան են եկել ոչ միայն տեխնիկա մատակարարելու, այլև համատեղ ձեռնարկությունների համար գործընկերներ գտնելու համար:
Նշենք, որ Բելառուսից ժամանած ընկերությունների թվում էին «Գորիզոնտ» և «Պլանար» էլեկտրոնային արդյունաբերության ընկերությունների, ինչպես նաև ավտոմոբիլային ու հատուկ տեխնիկայի ներկայացուցիչները: