ԵՐԵՎԱՆ, 20 ապրիլի – Sputnik. Հարավային Կովկասում նոր ենթակառուցվածքային երթուղիների ստեղծումը կնպաստի տարածաշրջանի կայուն զարգացմանը, ինչպես նաև խաղաղության և կայունության ամրապնդմանը: Ինչպես հաղորդում է ՏԱՍՍ-ը` ՀՀ վարչապետ Նիկոլ Փաշինյանի հետ հանդիպման ժամանակ այս մասին հայտարարել է ՌԴ կառավարության նախագահ Միխայիլ Միշուստինը։
ՌԴ կառավարության ղեկավարը նշել է, որ երկրի իշխանությունները հատուկ ուշադրություն են դարձնում «Անդրկովկասում տնտեսական և տրանսպորտային կապերի ապաշրջափակման վերաբերյալ» ՌԴ-ի, Հայաստանի և Ադրբեջանի ղեկավարների պայմանավորվածությունների կատարմանը:
«Վստահ եմ, որ նոր ենթակառուցվածքային երթուղիների ստեղծումը կապահովի տարածաշրջանի կայուն զարգացումը, կնպաստի խաղաղության և կայունության ամրապնդմանը՝ ի շահ Հարավային Կովկասի բոլոր պետությունների»,- ասել է Միշուստինը:
Նա նաև հավաստիացրել է, որ Մոսկվան կշարունակի մարդասիրական օգնություն ցուցաբերել Հայաստանին:
«Այժմ, այս պահին, հումանիտար արձագանքման միջազգային կենտրոնի գծով պայմաններ են ստեղծվում փախստականներին իրենց մշտական բնակության վայրեր վերադարձնելու և, իհարկե, ենթակառուցվածքի օբյեկտների վերականգնման համար»,- պարզաբանել է ՌԴ վարչապետը:
Իր հերթին Հայաստանի վարչապետն արդյունավետ է համարել նախօրեին Ռուսաստանի նախագահ Վլադիմիր Պուտինի հետ կայացած հանդիպումը և նշել, որ կարևոր պայմանավորվածություններ են ձեռք բերվել:
«Երեկ մենք Վլադիմիր Վլադիմիրովիչի հետ քննարկեցինք մեր միջպետական հարաբերությունների օրակարգի գրեթե ողջ ծավալը, անցկացրինք շատ արդյունավետ բանակցություններ և ձեռք բերեցինք շատ կարևոր պայմանավորվածություններ»,- ասել է Փաշինյանը:
Նա հավելել է, որ Ռուսաստանը Հայաստանի հիմնական առևտրատնտեսական գործընկերն է, և 2 երկրի առևտրի ծավալն աճում է: ՀՀ վարչապետի խոսքով՝ Մոսկվան ու Երևանն ակտիվորեն համագործակցում են Եվրասիական տնտեսական միության (ԵԱՏՄ) շրջանակներում, նաև էներգետիկայի ոլորտում է համագործակցության հարուստ փորձ կուտակվել: ՀՀ վարչապետը նշել է, որ երկրները նախատեսում են հետագայում ևս զարգացնել համագործակցությունը տրանսպորտի և այլ ոլորտներում, որտեղ արդեն կան հստակ ծրագրեր:
Պուտին-Փաշինյան բանակցությունները կայացել են ապրիլի 19-ին։ Դրանց արդյունքներով ընդունված համատեղ հայտարարության մեջ առաջնորդները հանդես են եկել ԵԱՏՄ-ում ինտեգրման զարգացման օգտին` ներառյալ ազգային արժույթներում հաշվարկների մասնաբաժնի ավելացումը, մտահոգություն են հայտնել մի շարք երկրների միակողմանի պատժամիջոցների կապակցությամբ և պայմանավորվել են համատեղ հաղթահարել ստեղծված մարտահրավերները, այդ թվում՝ պարենային և էներգետիկ անվտանգության և լոգիստիկայի բնագավառում: Փաշինյանն ու Պուտինը նշել են նաև Ադրբեջանի հետ եռակողմ ձևաչափով փոխգործակցությունն ակտիվացնելու անհրաժեշտությունը և ստորագրել են էներգետիկայի ոլորտում համագործակցության ծրագիր: